Онлайн
«Մենք վճռական ենք կիրառել Մոնտրյոյի կոնվենցիայով նեղուցներում նավերի երթևեկության հարցում մեզ տրված լիազորությունները՝ Ռուսաստանի և Ուկրաինայի միջև ճգնաժամի հետագա խորացումը կանխելու համար»,-թուրքական «Անադոլու» լրատվական գործակալության հաղորդմամբ՝ կառավարության նիստից հետո հղած տեսաուղերձում հայտարարել է Թուրքիայի նախագահ Ռեջեփ Թայիփ Էրդողանը։
Նա նշել է, թե «Անկարան շարունակում է դիվանագիտական բազմակողմ նախաձեռնությունները՝ տարածաշրջանում խաղաղություն և կայունություն ապահովելու համար»։
«Թուրքիան անընդունելի է համարում Ռուսաստանի ներխուժումը Ուկրաինա և գնահատում է Ուկրաինայի ղեկավարության ու ժողովրդի մղած պայքարը»,-հայտարարել է Էրդողանը՝ ընդգծելով, թե «ոչ ոք չպետք է կասկածի, որ իրենք կհաղթահարեն ճգնաժամը Սև ծովի հյուսիսում, ինչպես բոլոր այն մարտահրավերները, որոնց բախվել է Թուրքիան վերջին շրջանում»։
Նշենք՝ 1936թ․-ին ընդունված Մոնտրյոյի կոնվենցիայով՝ Թուրքիան պատերազմական իրավիճակում կամ նման վտանգի պարագայում իրավունք ունի սահմանափակել պատերազմող երկրների ռազմական նավերի անցումն իր վերահսկողության ներքո գտնվող Սև ծովից դեպի Միջերկրական ծով տանող Բոսֆորի և Դարդանելի նեղուցներով:
Հիշեցնենք՝ Ռուսաստանի նախագահ Վլադիմիր Պուտինի որոշմամբ փետրվարի 24-ին Ուկրաինայի նկատմամբ հատուկ ռազմական գործողության մեկնարկից հետո Կիևը պաշտոնապես խնդրել էր Անկարային սահմանափակել Բոսֆորի և Դարդանելի նեղուցներով ՌԴ ռազմանավերի անցումը։
