Պուտինն ու Ալիևը դաշնակցային համագործակցության մասին հռչակագիր են ստորագրել. ձեռնպահ են մնալու միմյանց դեմ ուղղված ցանկացած գործողությունից

Այսօր Կրեմլում կայացած բանակցությունների արդյունքում Ռուսաստանի և Ադրբեջանի նախագահները դաշնակցային համագործակցության մասին հռչակագիր են ստորագրել, որը, ինչպես հայտարարել է Վլադիմիր Պուտինը, նշանավորում է ռուս-ադրբեջանական միջպետական հարաբերությունների անցումը որակապես նոր մակարդակի։

«Անվտանգության ապահովման, խաղաղության ու կայունության պահպանման նպատակով Ռուսաստանի Դաշնությունը և Ադրբեջանի Հանրապետությունը կարող են դիտարկել փոխադարձ ռազմական օգնություն տրամադրելու հնարավորությունը՝ հիմնվելով ՄԱԿ-ի կանոնադրության, առանձին միջազգային պայմանագրերի վրա և հաշվի առնելով գործող միջազգային իրավունքը»,-ասվում է փաստաթղթում:

Հռչակագրով կողմերը նաև ձեռնպահ են մնալու միմյանց դեմ ուղղված ցանկացած գործողությունից՝ այդ թվում երրորդ պետությունների միջոցով իրականացվող:

Միաժամանակ, ձեռք է բերվել ռազմատեխնիկական համագործակցությունը զարգացնելու պայմանավորվածություն:

Լրատվամիջոցների համար արված հայտարարությունում Ադրբեջանի նախագահ Իլհամ Ալիևն ասել է, որ հռչակագիրը բավականին ծավալուն է՝ պարունակում է ավելի քան 40 կետ, այն ընդգրկում է երկկողմ փոխգործակցության ամենակարևոր ոլորտները: Ալիևի գնահատմամբ՝ ռուս-ադրբեջանական հարաբերությունները, որոնք վերջին տարիներին դրական զարգացում են ունեցել, այսօր ստորագրված փաստաթղթով կհասնեն ամենաբարձր մակարդակի, այն կարևորագույն նշանակություն կունենա երկկողմ հարաբերությունների ապագայի համար։