«Այստեղ մենք պետք է արդեն մի կողմ քաշվենք և թողնենք, որ բիզնեսն իր գործն անի»․ Միրզոյանը՝ հայ-ավստրիական գործարար համաժողովի բացմանը

Այսօր՝ փետրվարի 3-ին, Հայաստանի և Ավստրիայի արտաքին գործերի (ԱԳ) նախարարներ Արարատ Միրզոյանը և Ալեքսանդր Շալենբերգը մասնակցել են հայ-ավստրիական գործարար համաժողովի բացմանը: ՀՀ ԱԳ նախարար Արարատ Միրզոյանը հանդես է եկել ելույթով, որում, մասնավորապես, նշել է.

«Մեծարգո՛ պարոն նախարար,

Հարգելի՛ գործընկերներ,

Տիկնա՛յք և պարոնա՛յք,

Ուրախ եմ ողջունել բոլորիդ հայ-ավստրիական գործարար համաժողովի բացմանը: Այս համաժողովը իսկապես հրաշալի առիթ է` հայ-ավստրիական տնտեսական հարաբերություններում առկա մակարդակը ֆիքսելու, այն ավելի խորացնելու և փոխշահավետ նոր գործարար հարաբերություններ հաստատելու և, ընդհանուր առմամբ, մեր երկրների միջև տնտեսական հարաբերությունները նոր որակի բերելու համար: Մենք հնարավորություն ունենք ուղենշելու տնտեսական ոլորտում փոխգործակցության խորացմանն ուղղված մեր քայլերը, և այս տեսանկյունից մեծապես ողջունելի է տարբեր ոլորտներ ներկայացնող ավստրիական ընկերությունների մասնակցությունն այս համաժողովին:

Որպես ոչ տնտեսական, այլ քաղաքական ոլորտի մարդ` ուզում եմ ասել, որ մենք Հայաստանում ձեռնարկում ենք բոլոր անհրաժեշտ քայլերը, որպեսզի ապահովենք այն անհրաժեշտ բարենպաստ միջավայրը, որտեղ տնտեսական հարաբերությունները և բիզնես կապերը և, ընդհանրապես, բիզնեսը կարող է իրեն հարմարավետ զգալ: Այս առումով ես ուզում եմ նշել Հայաստանում ժողովրդավարական ինստիտուտների զարգացումը, կոռուպցիայի դեմ պայքարը, ազատ, իրապես մրցակցային շուկայական հարաբերություների հաստատումը, և համոզմունք ունեմ, որ ավստրիացի գործարարների և, ընդհանրապես, աշխարհի գործարարների համար այս բառերը պետք է որ հնչեն որպես մեղեդի, որովհետև կարծում եմ, որ սրանք այն նվազագույն անհրաժեշտ պայմաններն են, որտեղ բիզնեսը կարող է և պետք է իրեն հարմարավետ զգալ:

Նաև ուզում եմ ասել, որ Հայաստանն ունի որոշակի տնտեսական առավելություններ և ձեռքբերումներ վերջին տարիներին և հատկապես նորարարական տեխնոլոգիաների ոլորտում. նշենք «Արմաթ» լաբորատորիաները, ԹՈւՄՈ ստեղծարար կենտրոնները: Ուզում եմ հիշատակել, որ ԹՈւՄՈ-ի հաջող փորձը այժմ կիրառվում է Փարիզում, Բեռլինում, Մոսկվայում, Բեյրութում, Կիևում, Տիրանայում: Կարծում եմ` կարելի է դիտարկել նաև Վիեննայում և այլուր ԹՈւՄՈ-ների բացման հնարավորությունը:

Գիտեք իհարկե, որ Հայաստանը նաև Եվրասիական տնտեսական միության անդամ է՝ իր որոշակի առավելություններով, իր 180 միլիոնանոց շուկայով: Եվ կարծում եմ, որ գործարարներն այս հնարավորոթյունը ևս կարող են օգտագործել: Նաև ուզում եմ անպայման նշել, որ իմ լավ բարեկամի՝ սիրելի պարոն Շալենբերգի հետ երեկոյան քննարկում էինք այս համաժողովը և մտածում էինք, որ իսկապես մեր կողմից արել ենք ամեն ինչ, որպեսզի ապահովենք այն միջավայրը, որի մասին քիչ առաջ ասեցի: Եվ կարծում եմ, որ այստեղ մենք պետք է արդեն մի կողմ քաշվենք և թողնենք, որ բիզնեսն իր գործն անի: Ես հաջող ընթացք եմ մաղթում համաժողովին:

Շնորհակալ եմ»:

ՀՀ արտաքին գործերի նախարարության տեղեկացմամբ՝ գործարար համաժողովի ընթացքում նաև ստորագրվել են Հայ-ավստրիական առևտրատնտեսական և գիտատեխնիկական համագործակցության միջկառավարական հանձնաժողովի 8-րդ նիստի արձանագրությունը, ինչպես նաև համագործակցության հուշագրեր՝ հայկական ու ավստրիական ընկերությունների միջև:

Հայտնել էինք, որ երկկողմ հարաբերությունների հետագա զարգացմանն ու խորացմանը, դրանց որակական նոր լիցք հաղորդելու նպատակով փետրվարի 2-3-ը աշխատանքային այցով Հայաստան է ժամանել Ավստրիայի եվրոպականև միջազգային հարցերով դաշնային նախարար Ալեքսանդր Շալենբերգը: Կայացել է նրա առանձնազրույցը Արարատ Միրզոյանի հետ, ապա նաև՝ համատեղ մամուլի ասուլիսը։

Գործընկերները փետրվարի 2-ին մասնակցել են Ավստրիական զարգացման գործակալության գրասենյակի պաշտոնական բացման արարողությանը, ստորագրել են Համատեղ հռչակագիր ԵՄ արևելյան գործընկեր պետությունների հետ 2022֊2024թթ. Ավստրիական զարգացման համագործակցության շրջանակային ռազմավարության մասին: