Երկաթուղին ՀՀ տարածքում պետք է գործի մեր օրենքներով. Փաշինյանը՝ Օվերչուկի այցի, կոմունիկացիաների բացման ուղղությամբ առաջին գործնական արդյունքների մասին

«Այս այցը շատ կարևոր մի առանձնահատկություն ունի, մենք շատ մոտ ենք արձանագրելու տարածաշրջանի կոմունիկացիաների բացման եռակողմ աշխատանքային խմբի առաջին գործնական արդյունքները»,-Կառավարության այսօրվա նիստում հայտարարել է ՀՀ վարչապետ Նիկոլ Փաշինյանը՝ անդրադառնալով Ռուսաստանի Դաշնության (ՌԴ) փոխվարչապետ Ալեքսեյ Օվերչուկի և Ռուսական երկաթուղիներ ԲԲԸ տնօրեն Օլեգ Բելոզյորովի երևանյան այցին։

Նկատելով, որ նախորդ օրվա այցն ամբողջությամբ գործնական է եղել և միտված է եղել Երասխ-Ջուլֆա-Մեղրի- Հորադիզ երկաթուղային գծի կառուցման աշխատանքներին՝ Փաշինյանը տեղեկացրել է, որ այդ թեմայով արդեն պայմանավորվածություններ են ձեռք բերել, որի անբաժանելի մաս է այն հանգամանքը, որ երկաթուղին Հայաստանի տարածքում պետք է գործի ՀՀ օրենսդրության շրջանակներում, Ադրբեջանի տարածքում՝ նրանց օրենսդրության շրջանակներում:

Փաշինյանի խոսքով՝ ՌԴ փոխվարչապետի երեկվա այցը գործանականացմանն էր ուղղված և արդեն քննարկվում է տեխնիկական առաջադրանքի ձևակերպման, նախագծման, շինարարության մեկնարկի և ֆինանսավորման հարցերի շուրջ:

Վարչապետի գնահատմամբ՝ այս դինամիկայով շարունակվելու պարագայում կարող են վստահություն հայտնել, որ առաջիկայում այդ հնարավորությունը իրագործելը դառնում է առարկայական։

«Քանի դեռ երկաթուղին չի կառուցվել և առաջին գնացքը չի անցել, միշտ պետք է մտքում ունենալ, որ իրադրությունը սովորական չէ, բայց այն քաղաքական կամքը, որը արտահայտել ենք, ստանում է կոնկրետ դրսևորումներ»,-միաժամանակ հավելել է նա։