Նազարբաևը կզրկվի Ղազախստանի քաղաքականության վրա ազդելու հնարավորությունից

Ղազախստանի խորհրդարանի ստորին պալատի պատգամավորներն այսօր կողմ են քվեարկել օրենսդրական փոփոխություններին, որոնք վերացնում են երկրի նախկին նախագահ Նուրսուլթան Նազարբաևի հետ Ղազախստանի քաղաքականության հիմնական ուղղությունները համաձայնեցնելու անհրաժեշտությունը․ հունվարի 27-ին Սենատի՝ խորհրդարանի վերին պալատի պատգամավորներն առաջարկել են փոփոխություններ և լրացումներ կատարել Հանրապետության սահմանադրական որոշ օրենքներում։

DW-ի ռուսական ծառայության փոխանցմամբ՝ փոփոխություններ են նախատեսվում «Առաջին նախագահի մասին» հոդվածում, ըստ որի՝ 30 տարի երկիրը ղեկավարած Նազարբաևը զրկվում է Ղազախստանի ժողովրդի ասամբլեայի և երկրի Անվտանգության խորհրդի ղեկավարի պաշտոնից։ Միաժամանակ, նախկին նախագահը մնում է հանրապետության Սահմանադրական խորհրդի անդամ՝ պահպանելով կառավարությունում և խորհրդարանում ելույթ ունենալու իրավունքը։

Օրինագիծն ուղարկվել է նախագահ Կասիմ-Ժոմարտ Տոկաևին՝ ստորագրության համար։

Հիշեցնենք՝ հեղուկ գազի թանկացման պատճառով Ղազախստանի մի շարք բնակավայրերում հունվարի 2-ից սկսվել էին բողոքի ակցիաներ, որոնք օրերի ընթացքում վերածվել էին զանգվածային անկարգությունների, հարձակումներ էին իրականացվել պետական մարմինների վրա: Անկարգությունների հետևանքով վիրավորվել են հազարավոր մարդիկ, ըստ պաշտոնական տվյալների՝ զոհվել 225-ը, այդ թվում` մոտ երկու տասնյակ ոստիկաններ և զինծառայողներ: Ղազախստանի նախագահ Կասիմ-Ժոմարտ Տոկաևը, բողոքի ցույցերի համատեքստում, հայտարարել էր, որ Նուրսուլթան Նազարբաևի փոխարեն այսուհետ ինքն է Ղազախստանի Անվտանգության խորհրդի ղեկավարը։ Նա երկրում հակաահաբեկչական գործողությունների իրականացում անհրաժեշտություն էր համարել՝ օգնության համար դիմելով ՀԱՊԿ-ին: Ի պատասխան դիմումի՝ իրավիճակի կայունացման և կարգավորման նպատակով ՀԱՊԿ անվտանգության խորհրդի որոշմամբ՝ հունվարի 7-ին սահմանափակ ժամանակահատվածով Ղազախստան էին ուղարկվել ՀԱՊԿ հավաքական խաղաղապահ ուժեր։

Հիշեցնենք՝ Ղազախստանի Հանրապետությունը 1991 թվականի դեկտեմբերի 10-ից մինչև 2019 թվականի մարտի 19-ը ղեկավարել է Նուրսուլթան Նազարբաևը։ 81-ամյա Նազարբաևը 2019-ին ազատելով այդ պաշտոնը՝ մնացել էր որպես Անվտանգության խորհրդի ղեկավար։