Онлайн
«Երևանի կենդանաբանական այգի» ՀՈԱԿ-ի Կառավարման խորհուրդը հայտարարություն է տարածել՝ հորդորելով նախկին աշխատակիցներին «զերծ մնալ չստուգված տեղեկությունների վրա հիմնված գործողություններից, որոնց արդյունքում տուժում են, առաջին հերթին, կենդանիները։
Նշենք՝ Երևանի կենդանաբանական այգումտարբեր տարիներին աշխատած մասնագետներն այսօր, ժամը 13:00-ին, այգու դիմաց նախատեսել են բողոքի ակցիա անցկացնել՝ ընդդեմ կենդանիների շարունակական անկման և ապաշնորհ կառավարման։
«Երևանի կենդանաբանական այգու» կառավարման խորհրդի տարածած հայտարարությունում, ահա, ասված է․
«Ինչպես տեղեկացանք սոցիալական ցանցերից, Երևանի կենդանաբանական այգու դիմաց նախատեսվում է կազմակերպել ցույց։
Երևանի կենդանաբանական այգու Կառավարման խորհուրդը կոչ է անում ցույցերի կազմակերպիչներին և մասնակիցներին զերծ մնալ չստուգված տեղեկությունների վրա հիմնված գործողություններից, որոնք խաթարում են այգու բնականոն աշխատանքը, ինչի արդյունքում տուժում են, առաջին հերթին, բոլորիս պատասխանատվության ներքո գտնվող կենդանիները։
Այգու խնդիրները ԵԿԱ Կառավարման խորհրդի կենտրոնում են, դրանք պարբերաբար քննարկվում են, դրանց լուծման համար, այգու տնօրինության և աշխատակազմի հետ համատեղ, շարունակաբար մշակվում են համապատասխան գործողություններ:
Անգղների անկումը ԵԿԱ Կառավարման խորհրդի 29.01.2022թ. նիստի օրակարգային հարցերից էր։ Անկման պատճառները պարզաբանելու նպատակով իրականացվում են լաբորատոր հետազոտություններ, որոնց արդյունքների վերաբերյալ կտրվի հավելյալ տեղեկատվություն»։
