Онлайн
Պաշտոնական Բաքուն ողջունում և աջակցում է հայ-թուրքական բանակցությունների մեկնարկը։
Ադրբեջանական լրատվամիջոցների հաղորդմամբ՝ այդ մասին ասել է Ադրբեջանի արտաքին գործերի նախարարի տեղակալ Խալաֆ Խալաֆովը՝ ընդգծելով, թե ղարաբաղյան երկրորդ պատերազմի արդյունքում ընդունված համատեղ հայտարարությունների և դրանցում արտացոլված պայմանավորվածությունների իրականացումն այլընտրանք չունի։
«Տարածաշրջանը պետք է զարգանա դեպի խաղաղություն և կայունություն։ Այս նպատակներին ծառայող միակ ճանապարհը տարածաշրջանի երկրների միջև հարաբերությունների կարգավորումն է, թշնամանքից հրաժարվելը, երկրների միջև վստահության ամրապնդումը, տնտեսական կապերի զարգացումը, հաղորդակցությունների բացումը և պետությունների միջև համագործակցության միջավայրի ձևավորումը: Ուստի մենք ողջունում և աջակցում ենք Թուրքիայի նախաձեռնած թուրք-հայկական շփումների սկիզբը։ Մենք կարծում ենք, որ հայ-թուրքական հարաբերությունների կարգավորումը նաև պայմանավորում է հայ-ադրբեջանական հարաբերությունների կարգավորումը»,-ասել է Խալաֆովը։
Հիշեցնենք՝ հայ-թուրքական հարաբերությունների կարգավորման նպատակով հունվարի 14-ին Մոսկվայում կայացել է հայ և թուրք բանագնացների՝ Ռուբեն Ռուբինյանի և Սերդար Քըլըչի առաջին հանդիպումը, որը պաշտոնական Երևանը և Անկարան դրական ու կառուցողական են որակել:
