Онлайн
Հայաստան-Թուրքիա հարաբերությունների կարգավորման գործընթացի հատուկ ներկայացուցիչներ ՀՀ Ազգային ժողովի նախագահի տեղակալ Ռուբեն Ռուբինյանի և դեսպան Սերդար Քըլըչի առաջին հանդիպումն անցել է կառուցողական մթնոլորտում:
Այդ մասին հայտնում է ՀՀ արտաքին գործերի նախարարությունը՝ նշելով, որ Մոսկվայում
կայացած հանդիպման ընթացքում հատուկ ներկայացուցիչներն իրենց նախնական մտքերն են փոխանակել Հայաստանի և Թուրքիայի միջև երկխոսության միջոցով կարգավորման գործընթացի վերաբերյալ։
«Կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների։
Երկրորդ հանդիպման ամսաթիվն ու վայրը կորոշվի պատշաճ ժամկետում՝ դիվանագիտական ուղիներով»,-ասված է արտգործնախարարության հաղորդագրությունում։
Այսօր ավելի վաղ հայտնել էինք, որ հայ-թուրքական հարաբերությունների կարգավորման նպատակով երկու երկրների հատուկ բանագնացները ժամանել են Ռուսաստանի Դաշնության ԱԳՆ ընդունելությունների տուն, որտեղ կկայանա նրանց առաջին հնադիպումը:
