Երևանում վերջին 3 տարիներին 43 մանկապարտեզ է հիմնանորոգվել. քաղաքապետ Մարությանն այցելել է նախակրթարաններ

Եւս մի քանի օր, և կվերաբացվեն հիմնանորոգված երևանյան հերթական մանկապարտեզները․ նախակրթարաններում 2021թ. ծրագրով իրականացված աշխատանքներին ծանոթացել է Երևանի քաղաքապետ Հայկ Մարությանը՝ այցելելով հ. 107, 5 և հ. 144 մանկապարտեզներ:

Երևանի քաղաքապետարանից մանրամասնում են, որ այս ծրագիրն իրականացվում է ինչպես համայնքային բյուջեի միջոցներով, այնպես էլ Երևանի էներգաարդյունավետության ծրագրով: Նշվում է, որ նախագծերի իրագործման մոտեցումը հստակ է. ընտրված է հիմնանորոգման տարբերակը, ծրագրում ընդգրկված մանկապարտեզները կառուցման օրից ի վեր երբևէ չեն հիմնանորոգվել:

«Դուք գիտեք, որ մանկապարտեզներում երեխաների համար լավագույն պայմանների ստեղծումը մեր առաջնահերթություններից է: Եվ, որ կարևոր է, մենք այդ մանկապարտեզները ոչ թե ուղղակի նորոգում, այլ հիմնանորոգում ենք, լուծում ենք բոլոր խնդիրները՝ ենթակառուցվածքները, էներգաարդյունավետությունը, սեյսմակայունությունը: 2020թ. մենք երևանի բյուջեով հիմնանորոգել ենք 12 մանկապարտեզ, 2021թ. Երևանի բյուջեով ընթացքում է 8 մանկապարտեզի հիմնանորոգում, որից 3-ն արդեն ավարտվել է և 14 մանկապարտեզ էլ էներգաարդյունավետության ծրագրով ենք հիմնանորոգում: 2022թ. կհիմնանորոգենք ևս 9 մանկապարտեզ՝ նույնպես Երևանի բյուջեով: Փաստացի՝ այս երեք տարիների ընթացքում կստացվի, որ հիմնանորոգել ենք 43 մանկապարտեզ»,- նշել է Հայկ Մարությանը:

Շինարարության ավարտից հետո մանկապարտեզներն ստանում են լուսավոր, գունեղ ու հարմարավետ խմբասենյակներ, ընդարձակ դահլիճ ու մարզասրահ: Հիմնանորոգման ծրագրով վերանորոգվում են տանիքները, փոխվում են դռներն ու պատուհանները, ջրահեռացման համակարգերը, ներքին հաղորդալարերը, կառուցվում են երեխաների համար առավել հարմարավետ սանհանգույցներ։

Մայրաքաղաքում ընդհանուր առմամբ քաղաքապետարանի ենթակայությամբ գործում է 161 մանկապարտեզ: Կյանքի կոչվող ծրագրերն իրագործելուց հետո՝ 2020, 2021 և 2022թթ. ընթացքում, փաստացի կլուծվի երևանյան մանկապարտեզների մեկ քառորդի խնդիրը:

Հիշեցնենք՝ Երևանի ավագանու «Իմ քայլը» դաշինքը քաղաքապետ Հայկ Մարությանին անվստահություն հայտնելու գործընթաց է նախաձեռնել։ Ի թիվս մի շարք հիմնավորումների՝ նշվել է, որ իշխող ուժի՝ ««Իմ քայլը» դաշինքի օգտին քվեարկած քաղաքացիների մեկ հեղափոխական մանդատի արդյունքում քաղաքապետ ընտրված» Մարությանը խզել է կապը ավագանու քաղաքական մեծամասնության հետ, ինչպես նաև՝ «բավարար արդյունավետությամբ չի իրականացրել և չի իրականացնում «Իմ քայլը» դաշինքի՝ Երևանի քաղաքացիների առաջ ստանձնած և նախընտրական ծրագրով ամրագրված պարտավորությունները»։

Երևանի քաղաքապետի պաշտոնում «Իմ քայլը» առաջադրել է գործող առաջին փոխքաղաքապետ Հրաչյա Սարգսյանի թեկնածությունը։