Онлайн
էլեկտրական շարժիչով աշխատող տրանսպորտային միջոցների համար սահմանված ավելացված արժեքի (ԱԱՀ) հարկի արտոնությունը կերկարաձգվի ևս 2 տարով․ Շրջակա միջավայրի նախարարության կողմից մշակված«Հայաստանի Հանրապետության հարկային օրենսգրքում լրացում կատարելու մասին» Հայաստանի Հանրապետության օրենքի նախագիծը հավանության է արժոանեց ՀՀ կառավարության՝ նոյեմբերի 18-ի նիստում։
Ընդգծվում է, որ օրենքի ընդունմամբ նպաստավոր պայմաններ կտեղծվեն երկրում էլեկտրական շարժիչով աշխատող տրանսպորտային միջոցների ձեռքբերումն ու կիրառումը խթանելու, արդեն իսկ արձանագրված դրական արդյունքների շարունակականության ապահովման, շարժական աղբյուրներից մթնոլորտային օդի աղտոտվածության նվազեցման համար։
«Էլեկտրական շարժիչով տրանսպորտային միջոցների քանակի ավելացումն ուղղակիորեն կխթանի հանրապետությունում գիշերային ժամերին էլեկտրաէներգիայի սպառումը, քանի որ էլեկտրական շարժիչով տրանսպորտային միջոցների լիցքավորումը մեծամասամբ իրականացվում է գիշերային ժամերին։
Միաժամանակ էլեկտրական շարժիչով տրանսպորտային միջոցների քանակի զգալի աճը կնպաստի նաև դրանց շահագործման համար անհրաժեշտ ենթակառուցվածքների (լիցքավորման կայաններ, վերանորոգման կետեր և այլն) զարգացմանը՝ լրացուցիչ ներդրումների/միջազգային և մասնավոր հատվածի կողմից/ և նոր աշխատատեղերի ստեղծման միջոցով»,-մանրամասնում են Շրջակա միջավայրի նախարարությունից՝ հավելելով, որ նախագծի ընդունումը ուղղակիորեն կնպաստի նաև Կառավարության կողմից 2021թ. ապրիլի 22-ին ընդունված «Փարիզյան համաձայնագրի ներքո Հայաստանի Հանրապետության 2021-2030 թվականների Ազգային մակարդակով սահմանված գործողությունները հաստատելու մասին» որոշմամբ ամրագրված՝ մինչև 2030թ. ջերմոցային գազերի (ՋԳ) արտանետումները 1990թ. արտանետումների մակարդակի համեմատ 40 տոկոսով նվազեցնելու մասին ՀՀ պարտավորության իրականացմանը, հաշվի առնելով, որ շարժական աղբյուրներից մթնոլորտային օդի աղտոտումը ունի կարևոր դերակատարում մասնավորապես արտանետվող ջերմոցային գազերիհանրագումարի մեջ, իսկ համաձայն միջազգային կառույցների կողմից իրականացված ուսումնասիրությունների և վերլուծությունների՝էլեկտրական շարժիչով մեքենայի շահագործումը ի տարբերություն բենզինով կամ դիզելային վառելիքով աշխատող մեքենաների տարեկան միջինում 4.6 տոննա CO₂-ի արտանետումների կրճատում է ապահովում։
Հիշեցնենք՝ հանուն էկոլոգիապես մաքուր Հայաստանի՝ «էլեկտրամոբիլները Հայաստանում» նախաձեռնող խմբի և «Plug.am` էլեկտրական մեքենաների խթանումը Հայաստանում» ծրագրի կողմից 2020-ի սեպտեմբերի 21-ին Երևանում կայացել է էլեկտրամոբիլների առաջին շքերթը։
Երևանում էլեկտրական ավտոմեքենաների կիրառումը խթանելու նպատակով տարբեր քայլեր են ձեռնարկվում․ Օպերայի ստորգետնյա ավտոկայանատեղիում էլեկտրամոբիլների լցակայաններ են տեղադրվել, Հայաստանում լցակայանների արտադրություն է սկսվել։
