Արցախում բացվել է առաջին ուղղափառ եկեղեցին, տեղադրվել է խաղաղապահի հուշարձանը

Լեռնային Ղարաբաղում՝ Ստեփանակերտի մերձակայքում գտնվող ռուսական զինավանի տարածքում, բացվել է առաջին ուղղափառ եկեղեցին՝ ի պատիվ Քրիստոսի ծննդյան։

ՏԱՍՍ լրատվական գործակալության հաղորդմամբ՝ արարողությանը ներկա են եղել Հարավային ռազմական օկրուգի հրամանատարի տեղակալ, գեներալ-լեյտենանտ Ռուստամ Մուրադովը և Լեռնային Ղարաբաղում ռուսական խաղաղապահ զորախմբի հրամանատար Գենադի Անաշկինը։

«Ցավոք, Ղարաբաղում ռուսական ոչ մի եկեղեցի չի պահպանվել, խորհրդային տարիներին բոլորը բոլշևիկների կողմից ավերվել են, և այս պարագայում ի պատիվ Քրիստոսի Ծննդյան տոնի կանգնեցված ռուս ուղղափառ եկեղեցին սուրբ, պատմական նշանակություն է ձեռք բերում»,-նշել է Ստեփանակերտի ռուսական համայնքի ղեկավար Ալեքսանդր Բոդրովը։

Տաճարի բացումից հետո մատուցվել է առաջին աղոթքը։

ՏԱՍՍ-ի մեկ այլ հաղորդմամբ՝ ի պատիվ ռուսական խաղաղապահ կոնտինգենտի Լեռնային Ղարաբաղ մուտքի առաջին տարեդարձի՝ Ստեփանակերտի մերձակայքում գտնվող ռուսական զինավանի տարածքում բացվել է խաղաղապահի հուշարձանը։

Բրոնզաձույլ հուշարձանը պատկերում է զինված խաղաղապահի՝ «Կալաշնիկով» ինքնաձիգը ուսին, փխրուն աղջկան գրկած, ով նրան ծաղկեփունջ է նվիրում: Նշվում է հուշարձանի նախատիպը խաղաղապահ առաքելության իրական մասնակիցն է։

Հիշեցնենք՝ Ռուսաստանի Դաշնության խաղաղապահ ուժերը Ղարաբաղում են՝ 2020-ի նոյեմբերի 9-ի՝ Պուտին-Փաշինյան-Ալիև եռակողմ հայտարարության շրջանակներում:

Հայտարարության 4-րդ կետի համաձայն՝ խաղաղապահ զորակազմը տեղակայվել է 5 տարի ժամկետով, որը ինքնաբերաբար երկարաձգվելու է հերթական 5-ամյա ժամկետով, եթե միայն Կողմերից որևէ մեկը տվյալ ժամկետի ավարտից 6 ամիս առաջ չհայտարարի սույն դրույթի կիրառումը դադարեցնելու մտադրության մասին:

Պատրաստեց՝ Լիաննա Մարգարյանը