Պոլիէթիլենային տոպրակների տրամադրումն արգելելու նպատակով ստորագրահավաք է սկսվել

Մեկանգամյա օգտագործման պոլիէթիլենային տոպրակների տրամադրումը առևտրի կետերում արգելելու պահանջով ՀՀ քաղաքացի Միքայել Հովհաննիսյանի նախաձեռնությամբ change.org կայքում ստորագրահավաք է սկսվել: Պահանջը, որն ուղղվելու է ՀՀ կառավարությանը, հետևյալ բովանդակությունն է պարունակում.

«Պոլիէթիլենային տոպրակների օգտագործումը մեր օրերում համամոլորակային խնդիր է դարձել: Աշխարհում աղբի 75 % կազմում են պոլիէթիլենային տոպրակները: Դրանք բնության մեջ շատ երկար են քայքայվում՝ 100-400 տարվա ընթացքում: Միջինում այդ տոպրակների օգտագործելիության ժամկետը կազմում է 20 րոպե, բայց հետագայում այն դեռ պիտի քայքայվի դարերի ընթացքում:

Հայաստանում պոլիեթիլենային տոպրակներն աղբի տեսքով ամենուր են՝ քաղաքներում, գյուղերում, պատմամշակութային վայրերում, դաշտերում, ճանապարհների եզրերին, լճերում, գետերում, իսկ քամու ժամանակ ականատես ենք լինում տհաճ տեսարանի՝ թռչող տոպրակների ալիքի:

Ըստ վերջին տարիների միջինացված տվյալների՝ Հայաստանի Հանրապետությունում տարեկան օգտագործվում է մոտ 823 տոննա պոլիէթիլենային տոպրակ, ինչից գոյացած աղբը գրեթե չի վերամշակվում: Աղբանոցներում դրանք քամու միջոցով տարածվում է շրջակայքում, իսկ այրելու դեպքում արտադրվում է միջավայրն աղտոտող խիստ թունավոր, քաղցկեղածին քիմիական միացություն՝ դիօքսին:

Այս խնդիրները հաշվի առնելով՝ Հայաստանում պետք է արգելվեն մեկանգամյա օգտագործման տոպրակների տրամադրումը խանութներում, իսկ փոխարենը վաճառվեն որակյալ, բազմամյա օգտագործման տոպրակներ (գնում եք մեկ անգամ, օգտագործում ամեն անգամ առևտուր անելիս): Կարելի է կիրառել նաև կտորե կամ թղթե պայուսակներ և արկղեր: Գուցե սկզբում դժվարություններ առաջանան բնակչության շրջանում, բայց եթե մի շարք երկրներ (ինչպես օրինակ՝ Իտալիա, Գերմանիա, Իռլանդիա, Ֆրանսիա, ԱՄՆ-ի մի շարք նահանգներ, այս սեպտեմբերից նաև Վրաստան, և այլն) կարողանում են ապրել առանց մեկանգամյա օգտագործման տոպրակների, ապա մենք նույնպես կարող ենք: Կարևորը հասարակության գիտակցումն է և սերը բնության ու հայրենիքի նկատմամբ»:

Ովքեր համաձայն են այդ գաղափարի հետ՝ կարող են անցնել այս հղումով և ստորագրել: