«Ադրբեջանական զինուժը Գեղարքունիքում ինժեներական ակտիվ աշխատանքներ չի իրականացնում, նոր ճանապարհներ չի կառուցել»․ ՊՆ-ն ՄԻՊ-ի պնդումները իրականությունից կտրված է որակում - RadioVan.fm

Онлайн

«Ադրբեջանական զինուժը Գեղարքունիքում ինժեներական ակտիվ աշխատանքներ չի իրականացնում, նոր ճանապարհներ չի կառուցել»․ ՊՆ-ն ՄԻՊ-ի պնդումները իրականությունից կտրված է որակում

2021-10-19 20:36 , Политика, 964

«Ադրբեջանական զինուժը Գեղարքունիքում ինժեներական ակտիվ աշխատանքներ չի իրականացնում, նոր ճանապարհներ չի կառուցել»․ ՊՆ-ն ՄԻՊ-ի պնդումները իրականությունից կտրված է որակում

ՀՀ պաշտպանության նախարարությունն (ՊՆ) այսօր պարզաբանում է տարածել ՀՀ մարդու իրավունքների պաշտպանի (ՄԻՊ) կողմից նախօրեին՝ հոկտեմբերի 18-ին տարածած հաղորդագրության առնչությամբ։

Հիշեցնենք՝ Արման Թաթոյանը հայտնել էր, որ ՀՀ Գեղարքունիքի մարզ ներխուժած ադրբեջանական զինված ուժերը կառուցել են մեծ ապաստարաններ, կուտակել են մեծ քանակությամբ վառելափայտ, բետոնապատել են իրենց դիրքեր տանող ճանապարհները:

Նրա փոխանցմամբ՝ վերջիններիս ակտիվությունը շեշտակի է մեծացել, ավելին, շարունակում են նոր ճանապարհների կառուցումը, դիրքերում ավելացրել են զինծառայողների քանակն ու սպառազինությունը, անընդհատ կատարում են դիրքային ամրացման և ինժեներական ակտիվ աշխատանքներ:

Հայտարարությունում ընդգծվել էր, որ ներկայացված տվյալները՝ ՀՀ մարդու իրավունքների պաշտպանի աշխատակազմի, այդ թվում՝ Գեղարքունիքի մարզային ստորաբաժանման փատահավաք աշխատանքների շրջանակում հաստատվել են հավաստի ապացույցներով ու ստուգված են մի քանի աղբյուրով։

ՀՀ պաշտպանական գերատեսչությունից, ահա, ընդգծում են, որ նշված գրառման մեջ առկա են մի շարք անճշտություններ, ինչպես նաև պնդումներ, որոնք կտրված են իրականությունից։

«Մասնավորապես, ՄԻՊ գրառման մեջ նշվում է, որ «ՀՀ Գեղարքունիքի մարզ ներխուժած ադրբեջանական զինված ուժերը կառուցել են մեծ ապաստարաններ, կուտակել են մեծ քանակությամբ վառելափայտ, բետոնապատել են իրենց դիրքեր տանող ճանապարհները: Նրանց ակտիվությունը վերջին շրջանում շեշտակի է մեծացել։ Ավելին, շարունակում են նոր ճանապարհների կառուցումը, դիրքերում ավելացրել են զինծառայողների քանակն ու սպառազինությունը: Անընդհատ կատարում են դիրքային ամրացման և ինժեներական ակտիվ աշխատանքներ»: ՄԻՊ գրառման մեջ առկա այս պնդումներն ակնհայտորեն ուռճացված են, քանի որ ադրբեջանական ԶՈւ ստորաբաժանումների կողմից ինժեներական ակտիվ աշխատանքներ չեն իրականացվում, մեծ ապաստարաններ, կամ նոր ճանապարհներ չեն կառուցվել, ավելին՝ նրանց կողմից այդպիսի աշխատանքների փորձերը հաջողությամբ կանխվում են ՀՀ ԶՈւ ստորաբաժանումների կողմից։ Ինչ վերաբերում է ադրբեջանական զինծառայողների թվաքանակի և սպառազինության ավելացման մասին պնդմանը, ապա հարկ ենք համարում նշել, որ ադրբեջանական զինծառայողների ամբողջ շարժը վերահսկվում է հայկական ԶՈւ ստորաբաժանումների կողմից և, վերջին շրջանում, նման գործընթաց չի արձանագրվել։

Կոչ ենք անում մեր հասարակության համար զգայուն թեմաների շուրջ նմանատիպ գրառումներ կատարելիս փաստական տվյալները ճշտել նաև պաշտպանական գերատեսչության հետ, որը, ինչպես ամբողջ այս ընթացքում, այնպես էլ հետագայում, պատրաստ է ամենասերտ համագործակցության ՄԻՊ գրասենյակի հետ»,-ասված է ՀՀ ՊՆ տարածած պարզաբանման մեջ։

Лента

Рекомендуем посмотреть