«Մոդեռնա»-ի պատվաստանյութը Հայաստանում է, հասանելի կլինի պոլիկլինիկաներում և շարժական պատվաստումային կետերում․ ԱՆ

ՀՀ առողջապահության նախարարությունից (ԱՆ) հայտնում են, որ ամերիկյան «Մոդեռնա» ընկերության 50 հազար դեղաչափ «Սպայկվաքս» պատվաստանյութը հասել է Հայաստան:

Այն Հայաստանի Հանրապետությանը նվիրաբերել է Լիտվայի կառավարությունը։

Առողջապահական գերատեսչությունը շնորհակալություն է հայտնում Լիտվայի Հանրապետության կառավարությանը, առողջապահության նախարարությանը և Հայաստանում Լիտվայի դեսպան Ինգա Ստանիտե-Տոլոչկիենեին՝ COVID-19-ի դեմ պայքարում Հայաստանին օժանդակելու համար:

Նախաձեռնությունը կյանքի կոչելու հարցում ներդրած ջանքերի համար նախարարությունը շնորհակալություն է հայտնում նաև «Flagship Pioneering և Moderna Therapeutics» ընկերությունների ղեկավարությանը, «Ավրորա» մարդասիրական նախաձեռնության համահիմնադիր Նուբար Աֆեյանին։

Տեղեկացվում է, որ բաշխումից հետո ներկրված խմբաքանակը հասանելի կլինի առողջության առաջնային պահպանման օղակում և շարժական պատվաստումային կետերում:

Ընդգծվում է՝ ինչպես Հայաստանում կիրառվող մյուս պատվաստանյութերը, «Սպայկվաքս» պատվաստանյութը ևս նախատեսված է 18 և բարձր տարիքի անձանց շրջանում կորոնավիրուսային հիվանդության դեմ պատվաստումներ իրականացնելու համար: