Ադրբեջանցի զինծառայողները հրկիզել են Գեղարքունիքի ևս 2 գյուղերի մերձակա տարածքները. ՄԻՊ - RadioVan.fm

Онлайн

Ադրբեջանցի զինծառայողները հրկիզել են Գեղարքունիքի ևս 2 գյուղերի մերձակա տարածքները. ՄԻՊ

2021-09-06 15:54 , Право, 1443

Ադրբեջանցի զինծառայողները հրկիզել են Գեղարքունիքի ևս 2 գյուղերի մերձակա տարածքները. ՄԻՊ

ՀՀ մարդու իրավունքների պաշտպանը (ՄԻՊ), ստացված ահազանգերի հիման վրա, հայտարարում է՝ ադրբեջանական զինծառայողները սեպտեմբերի 4-ին նորից հրդեհներ են գցել ՀՀ Գեղարքունիքի մարզի Ազատ գյուղի հարևանությամբ, Նորաբակ գյուղիցդեպի Ազատ տանող ճանապարհի հատվածում (ադրբեջանական դիրքի անմիջական հարևանությամբ):

Երեկվա տվյալներով, ըստ Պաշտպանի, այրվել է մոտ 40 հա արոտավայր, որի խոտը սակավության պատճառով բնակիչները հնձում են՝ որպես անասնակեր։

Ըստ ահազանգերի՝ Կութ գյուղում հրդեհի նոր օջախներ չկան. ծխացող հատվածներ են, որոնք գյուղի ուղղությունից թեքվել են ադրբեջանական դիրքերի կողմ (բայց խոսքը ՀՀ ինքնիշխան տարածքի և ՀՀ գյուղերի բնակիչների կողմից օգտագործվող կամ նրանց պատկանող հողատարածքների մասին է):

Սոթք գյուղի հարևանությամբ ևս առաջացել է հրդեհի նոր օջախ:

«Ադրբեջանական զինծառայողների այս արարքների հետևանքով օգոստոսի 29-ից սկսած արդեն քանի օր է ոչնչացվում են քաղաքացիական բնակիչների պատկանող արոտավայրերն ու խոտհարքները, մարդիկ զրկվում են ապրուստի աղբյուրից, ինչն իր հերթին նպաստելու է մարդկանց սոցիալական խնդիրների ավելացմանը:

Հրդեհներն իրական վտանգ են քաղաքացիական բնակչության կյանքի, նրանց ողջ սեփականության համար. եղանակային պայմաններն էլ ավելի են նպաստում տարածմանը:

Նշված ահազանգերը ստուգվել են ՀՀ մարդու իրավունքների պաշտպանի Գեղարքունիքի մարզային ստորաբաժանման կողմից, հաստատվել են օբյեկտիվ ապացույցներով»,-գրել է Արման Թաթոյանը՝ հրապարակելով տեսանյութ:

Մարդու իրավունքների պաշտպանի աշխատակազմից ընդգծում են՝ բոլոր նյութերը սահմանված կարգով կամփոփվեն և վերլուծված կուղարկվեն միջազգային կազմակերպութուններին, ՀՀ համապատասխան մարմիններին ու հասարակական կազմակերպություններին:

Лента

Рекомендуем посмотреть