Онлайн
Հանրապետության նախագահ Արմեն Սարգսյանը ցավակցական ուղերձ է հղել Քաբուլի միջազգային օդանավակայանում տեղի ունեցած ահաբեկչական գործողությունների կապակցությամբ:
Ուղերձում ասված է.
«Խստորեն դատապարտում ենք Քաբուլի միջազգային օդանավակայանում տեղի ունեցած ահաբեկչական գործողությունները, որին զոհ են գնացել բազմաթիվ անմեղ քաղաքացիական անձինք և զինվորականներ:
Հայաստանը մշտապես հանդես է եկել մարդկության դեմ ուղղված ահաբեկչական ցանկացած դրսևորման դեմ, հատկապես՝ ահաբեկիչների մասնակցությանը ռազմական գործողություններում:
Միջազգային ահաբեկչության դեմ պայքարում անհրաժեշտ է համախմբել ուժերը՝ բացառելու անհանդուրժողականության և համամարդկային արժեքների նկատմամբ արհամարհանքի նման հրեշավոր դրսևորումները:
Զոհվածների ընտանիքներին ու մերձավորներին մաղթում ենք տոկունություն և ոգու արիություն, իսկ վիրավորներին՝ շուտափույթ ապաքինում»:
Հիշեցնենք՝ հինգշաբթի երկու պայթյուն էր գրանցվել Քաբուլի օդանավակայանի մոտակայքում. առաջին պայթյունն իրականացրել է մահապարտ-ահաբեկիչը, այնուհետև մեքենայում պայթուցիկ նյութեր են պայթել: Միջազգային լրատվամիջոցները, վկայակոչելով «Իսլամական պետություն» ահաբեկչական խմբավորման հայտարարությունը, հայտնում են, որ օդանավակայանի վրա հարձակման պատասխանատվությունը ստանձնել է խմբավորումը:
«ՌԻԱ Նովոստիին» Աֆղանստանի առողջապահության նախարարությունում սեփական աղբյուրը հայտնել է, որ տեղի ունեցած պայթյունների հետևանքով ավելի քան 1300 մարդ է վիրավորվել, զոհվել է Աֆղանստանի առնվազն 90 քաղաքացի, ինչպես նաև Պենտագոնի տվյալներով՝ 13 ամերիկացի զինվոր:
