Онлайн
Արցախի Մարտունու շրջանի Մաճկալաշեն գյուղի գերեվարված բնակիչը Ադրբեջանի զինված ուժերի (ԶՈւ) կողմից ծեծի և անմարդկային վերաբերմունքի է ենթարկվել, ինչի հետևանքով վնասվել է աջ ոտքը:
Այս մասին հայտնում է Արցախի մարդու իրավունքների պաշտպան (ՄԻՊ) Գեղամ Ստեփանյանը։
Հիշեցնենք Արցախի օմբուդսմենը երեկ ստացված ահազանգի հիման վրան պարզել էր, որ Մաճկալաշեն համայնքի 1989 թվականին ծնված բնակիչը կորած անասունների որոնման ընթացքում հայտնվել է ադրբեջանական զինված ուժերի վերահսկողության տակ գտնվող տարածքում։
Ավելի ուշ տեղեկացվել էր, որ գերեվարված բնակիչը ռուսական խաղաղապահ ուժերի միջամտությամբ փոխանցվել է հայկական կողմին։
Իրականացված բժշկական զննության արդյունքում, ահա, պարզվել է, որ նա Ադրբեջանի զինված ուժերի կողմից ծեծի և անմարդկային վերաբերմունքի է ենթարկվել, ինչի հետևանքով վնասվել է աջ ոտքը, պատառոտվել են շորերը:
Գեղամ Ստեփանյանի փոխանցմամբ՝ քաղաքացին այժմ գտնվում է գյուղի իր տանը:
«Ադրբեջանական կողմը շարունակում է իր ագրեսիվ պահվածքը՝ առիթը բաց չթողնելով խոշտանգելու ու նվաստացնելու իրենց վերահսկողության տակ հայտնված քաղաքացիներին»,-արձանագրում է Արցախի Մարդու իրավունքների պաշտպանը՝ միջազգային կազմակերպությունների և Արցախի իրավապահ մարմինների ուշադրությունը հրավիրելով միջադեպի վրա:
