Онлайн
«Մենք պատրաստ ենք Հայաստանի հետ խաղաղության պայմանագիր ստորագրել: Այսինքն ՝ մենք պատրաստ ենք սկսել աշխատել դրա վրա, սակայն Հայաստանից այդ առնչությամբ պաշտոնական պատասխան չկա: Ոչ պաշտոնական խողովակներով մեզ հասած տեղեկատվության համաձայն՝ Հայաստանը պատրաստ չէ դրան: Կարծում եմ ՝ սա շատ մեծ սխալ կլինի: Ե՛վ պատերազմի նախորդ օրը, և՛ պատերազմի ընթացքում հայկական կողմը մեծ սխալներ թույլ տվեց, կատարեց ռազմական հանցագործություններ»,-այս մասին այսօր հայտարարել է Ադրբեջանի նախագահ Իլհամ Ալիևը՝ պատերազմի ընթացքում հաշմանդամ դարձած զինծառայողներին և պատերազմի զոհերի ընտանիքներին բնակարանների և մեքենաների նվիրման արարողությանը։
Ալիևն ընդգծել է, թե իրենց առաջարկը հիմնված է նոր իրական իրավիճակի վրա:
«Մենք գտնում ենք, որ հարցը լուծված է, և Հայաստանի և Ադրբեջանի միջև պետք է կնքվի խաղաղության պայմանագիր: Կողմերը պետք է ճանաչեն միմյանց տարածքային ամբողջականությունը և սահմանները, սկսեն աշխատանքները՝ սահմանների դելիմիտացիայի ուղղությամբ, որի վերաբերյալ միջազգային կազմակերպություններից ևս այժմ դրական ազդակներ են ստացվում»,-ադրբեջանական լրատվամիջոցների հաղորդմամբ ասել է Ալիևը՝ շեշտելով, թե, եթե Հայաստանը չի ցանկանում դա անել, իր գործն է, բայց պետք է լավ մտածեն այդ ուղղությամբ, քանի որ հետագայում կարող է ուշ լինել
«Եթե Հայաստանում դրան բացասական արձագանք կա, դա նրանց գործն է Բայց ես նորից եմ ասում, միեւնույն է, նրանք կզղջան»,-հավելել է նա:
