Մայր Աթոռը դատապարտում է Ադրբեջանի իշխանությունների կողմից Արցախում իրականացվող մշակութային եղեռնագործությունը - RadioVan.fm

Онлайн

Մայր Աթոռը դատապարտում է Ադրբեջանի իշխանությունների կողմից Արցախում իրականացվող մշակութային եղեռնագործությունը

2021-05-05 16:07 , Общество, 762

Մայր Աթոռը դատապարտում է Ադրբեջանի իշխանությունների կողմից Արցախում իրականացվող մշակութային եղեռնագործությունը

Մայր Աթոռ Սուրբ Էջմիածինը ցավով է արձանագրում, որ Արցախյան երկրորդ պատերազմի ընթացքում և հետպատերազմյան շրջանում չեն դադարել հայոց հոգևոր և մշակութային ժառանգության հանդեպ Ադրբեջանի կողմից իրականացվող բարբարոսական գործողությունները։

Տարածած հայտարարությունում ասված է․

«Այսօր, հարաբերական խաղաղության պայմաններում, շարունակվում են թիրախավորվել հայոց սրբավայրերը՝ նպատակ հետապնդելով վերացնել Արցախի պատմական մեր հողի վրա հայկական ինքնության հետքերն ու վկայությունները։ Ադրբեջանի վերահսկողության տակ անցած տարածքներում արդեն իսկ ոչնչացվել են սրբավայրեր, պղծվել վանքեր ու եկեղեցիներ և վերացվել դրանց պատմական պատկանելիությունը հավաստող արձանագրություններ, անարգվել խաչքարեր և նախնյաց շիրիմներ։ Պատմության խեղաթյուրման և կեղծման ճանապարհով փորձեր են կատարվում յուրացնել այդ տարածքներում առկա շուրջ 150 հայկական սրբատեղիները և աշխարհին ներկայացնել իբրև ուդիների կրոնական ժառանգություն։ Օրեր առաջ հայտնի դարձավ նաև վերանորոգության պատճառաբանությամբ Արցախի թեմի առաջնորդանիստի՝ Շուշիի Ղազանչեցոց Սուրբ Ամենափրկիչ տաճարի հոգևոր խորհրդանիշները վերացնելու և գմբեթի վեղարը վայր բերելու փաստը։

Մայր Աթոռ Սուրբ Էջմիածինը դատապարտում է Ադրբեջանի իշխանությունների կողմից իրականացվող մշակութային եղեռնագործությունը, ինչն անսքող արտահայտություն է հայատյացության, անհանդուրժողականության և թշնամանքի։

Հակառակ հնչող հայտարարությունների և արդարացումների, որդեգրված այս քաղաքականությունը չի կարող որևէ կերպ նպաստել տարածաշրջանում կայունության և տևական խաղաղության վերահաստատմանը։

Հայաստանյայց Առաքելական Սուրբ Եկեղեցին պիտի շարունակի այս խնդիրները բարձրաձայնել միջազգային հանրության և պատկան կառույցների առջև՝ կասեցնելու հայ ժողովրդի իրավունքները ոտնահարող այս երևույթները»։

Նշենք՝ օրեր առաջ հայտնի դարձավ, որ Շուշին օկուպացրած ադրբեջանցիները քադել են Սուրբ Ամենափրկիչ եկեղեցու դարպասների հրեշտակների քանդակները, հանել են խաչը, «մայիսի 9-ին ընդառաջ էլ՝ գմբեթները»։ Արցախի մարդու իրավունքների պաշտպանը ահազանգել է՝ «նորոգման աշխատանքների» քողի տակ ադրբեջանցիները աղավաղում են Ղազանչեցոց եկեղեցին։

Հայաստանի արտաքին գործերի նախարարությունից շեշտել են՝ Ադրբեջանի այս գործողությունները նպատակ ունեն հայկական ինքնությունից զրկել Շուշիի Մայր տաճարը։

Հայ առաքելական եկեղեցու Արցախի թեմը խստորեն դատապարտելով կատարվածը՝ կոչ է արել միջազգային հանրությանը դատապարտել Ադրբեջանի մշակութակործան գործունեությունը և քայլեր ձեռնարկել այս ավերիչ գործնթացը կասեցնելու համար։

Лента

Рекомендуем посмотреть