«Հայաստանը Ադրբեջանին պահանջներ ներկայացնելու որևէ բարոյական իրավունք չունի»․ Հաջիև

Մեխակավանի (Ջաբրայիլ) Սուրբ Աստվածածին եկեղեցու ոչնչացման մասին BBC-ի ռեպորտաժի հեռարձակումից հետո Ադրբեջանի նախագահի օգնական Հիքմեթ Հաջիևը Twitter-ում գրել է, թե Հայաստանը որևէ պահանջ ներկայացնելու բարոյական իրավունք չունի։

«Ադրբեջանցի ժողովրդի ժառանգության և սեփականության հանդեպ թույլ տված անասելի վանդալիզմից հետո Հայաստանը Ադրբեջանին պահանջներ ներկայացնելու որևէ բարոյական իրավունք չունի։ Հայաստանը Երկրորդ համաշխարհային պատերազմի զավթիչ պետությունների օրինակով պետք է ներողություն խնդրի ադրբեջանցիներից և ստանձնի պատասխանատվությունը»,-գրել է Հաջիևը՝ կից հրապարակելով ծառարմատների լուսանկար։

Armenia even doesn't have moral rights to put any claims agst after committing inconceivable vandalism/urbucide/ecocide in seized lands against heritage and property of people. Armenia like occupying powers of WWII must apologize to Azerbaijani people/assume responsibility. pic.twitter.com/HmNgkl90AS
— Hikmet Hajiyev (@HikmetHajiyev) March 25, 2021

Հիշեցնենք՝ 2017 թվականին Մեխակավանում օծված Սուրբ Աստվածածին եկեղեցու ոչնչացման փաստը հաստատվել է BBC World News լրատվամիջոցի հրապարակումով․ լրագրող Ջոնա Ֆիշերն Արցախի գրավյալ տարածքներ այցելության ժամանակ պարզել է, որ հայկական մի եկեղեցի պարզապես անհետացել է․ այն հիմնահատակ ավերել են։ Լրագրողին տեղի ոստիկանն ասել է, թե տեղյակ չէ եկեղեցու մասին, սակայն քարտեզով, ինչպես նաև տեղանքում գտնվող երկու ծառերի օգնությամբ հնարավոր է եղել տեղորոշել եկեղեցու գտնվելու վայրը։ Պարզվել է՝ այն չկա, հիմնահատակ ավերված է։ Լրագրողն անհետացած եկեղեցու պատկերները արդեն Բաքվում ցուցադրել է Ադրբեջանի նախագահի օգնական Հիքմեթ Հաջիևին, որն ասել է, որ տեղյակ չէ, կոորդինատները պետք է ստուգել։

ՅՈւՆԵՍԿՕ-ի Հայաստանի ազգային հանձնաժողովն էլ, տեղեկացնելով, որ Ադրբեջանը գետնին է հավասարեցրել իր ենթակայության տակ անցած տարածքում գտնվող եկեղեցիներից մեկը՝ դատապարտել է իրողությունը՝ ընդգծելով, որ եկեղեցին ավերվել է «Իսլամական պետություն» ահաբեկչական խմբավորման «ձեռագրով»։

Strongly condemn yet another act of cultural #crime by #Azerbaijan. As BBC found out #Armenia/n church disappeared after Azerbaijani got control over it. Destruction was complete. The same church was vandalized during the recent aggression. @UNESCO @BlueShield_Int pic.twitter.com/1QEltQglnE
— Armenian National Commission for UNESCO (@ArmUnesco) March 25, 2021

«Տեղի ունեցածը Ադրբեջանում հայատյացության և կրոնական հիմքով ատելության քաղաքականության հերթական արդյունքն է, միջազգայնորեն երաշխավորված կրոնական ազատության կոպիտ ոտնահարում»,-հայտարարել է Հայաստանի մարդու իրավունքների պաշտպան Արման Թաթոյանը։

ՀՀ արտաքին գործերի նախարարության մամուլի խոսնակ Աննա Նաղդալյանն էլ ընդգծել է, որ Ադրբեջանական կողմի բոլոր փորձերը՝ արդարացնելու պաշտամունքի վայրի բարբարոսական ոչնչացումը, մտահոգիչ և դատապարտելի են:

Գլխավոր դատախազությունն էլ տեղեկացրել է, որ քննության առրկա կդարձնի Մեխակավանի և Շուշիի եկեղեցիներն ավերելու փաստերը։

Պատրաստեց՝ Լիաննա Մարգարյանը