Онлайн
ՀՀ առողջապահության նախարարությունից հայտնում են, որ Առողջապահության համաշխարհային կազմակերպության (ԱՀԿ) հետ քննարկել է վերջին շրջանում «AstraZeneca» պատվաստանյութի վերաբերյալ շրջանառվող տարաբնույթ տեղեկատվությունը և ստացել պարզաբանումներ։
Նախարարության տարածած հաղորդագրությունում, մասնավորապես, ասված է․
«ԱՀԿ-ն ուսումնասիրում է պատվաստվածների շրջանում արյան մակարդելիության խանգարումների հետ կապված առկա տվյալները: Կարևոր է նշել, որ համաձայն Եվրոպական դեղերի գործակալության Դեղագիտության ռիսկերի գնահատման հանձնաժողովի դիրքորոշման` պատվաստանյութի օգուտները շարունակում են գերազանցել ռիսկերը, և պատվաստանյութը կարող է շարունակել կիրառվել մինչև հետազոտությունների ավարտը:
Պատվաստանյութերի անվտանգության գլոբալ խորհրդատվական կոմիտեն (GACVS) մանրակրկիտ ուսումնասիրում է «AstraZeneca» պատվաստանյութի վերաբերյալ առկա տվյալները, որոնց վերջնական ամփոփումից հետո ԱՀԿ դիրքորոշման ցանկացած փոփոխության մասին կտեղեկացվի հանրությանը:
Միաժամանակ, COVID-19-ի դեմ պատվաստումները չեն կարող նվազեցնել այլ պատճառներով պայմանավորված մահացությունը: Նման դեպքերը կշարունակեն գրանցվել նաև պատվաստումից հետո` չունենալով պատճառահետևանքային կապ պատվաստման հետ:
2021 թվականի մարտի 12-ի դրությամբ` ամբողջ աշխարհում իրականացվել է ավելի քան 335 միլիոն դեղաչափ պատվաստում COVID-19-ի դեմ, և մինչ օրս պատվաստանյութերով պայմանավորված մահվան դեպքեր չեն գրանցվել, այն պարագայում, որ կորոնավիրուսային հիվանդությունից գրանցվել է առնվազն 2,6 միլիոն մահ: ԱՀԿ-ն երկրներին առաջարկում է շարունակել հետպատվաստումային անբարեհաջող դեպքերի դիտարկումը:
«AstraZeneca» ընկերության տարածած հաղորդագրության համաձայն՝ իրենց պատվաստանյութի անվտանգության և որակի առումով չկա որևէ անհանգստացնող փաստ: Իրականացվել են լրացուցիչ բազմաթիվ հետազոտություններ եվրոպական մի շարք անկախ առողջապահական մարմինների կողմից, որոնց արդյունքում ոչ մի խնդրահարույց երևույթ չի հայտնաբերվել:
Եվրոպայում և Միացյալ Թագավորությունում պատվաստվել է ավելի քան 17 մլն անձ, որոնց առկա տվյալների մանրամասն ուսումնասիրությունը ցույց է տվել, որ չկա թոքային զարկերակի էմբոլիայի, խորը երակների թրոմբոզի կամ թրոմբոցիտոպենիայի առաջացման ռիսկի աճ որևէ սեռային, տարիքային խմբում, կոնկրետ երկրում կամ կոնկրետ խմբաքանակում: Միաժամանակ, հաղորդված դեպքերի թիվը շատ ավելի ցածր է, քան թրոմբոզի այն հարյուրավոր դեպքերը, որոնք ակնկալվում են բնակչության ընդհանուր պոպուլյացիայում:
Կորոնավիրուսային հիվանդության (COVID-19) դեմ առկա բոլոր պատվաստանյութերն ունեն համադրելի արդյունավետություն: Ներկայումս այն գնահատվում է՝ հիմնվելով միլիոնավոր անձանց շրջանում կիրառվող պատվաստումների տվյալների վրա, ովքեր նույն ժամանակահատվածում միևնույն երկրում ստանում են տարբեր պատվաստանյութեր: Մասնավորապես, Մեծ Բրիտանիայում կիրառվել է մոտ 20մլն դեղաչափ «Pfizer» ընկերության պատվաստանյութ և 20մլն դեղաչափ «AstraZeneca» ընկերության պատվաստանյութ և իրականացված հետազոտությունները ցույց են տվել, որ երկու պատվաստանյութի մեկ դեղաչափի արդյունավետությունը նույնն է: «AstraZeneca» պատվաստանյութի արդյունավետությունը 70 տարեկանից բարձր տարիքի անձանց շրջանում անախտանիշ դեպքերի կանխարգելման առումով ավելի բարձր է, քան «Pfizer»-ինը: Շոտլանդիայում «AstraZeneca» պատվաստանյութի արդյունավետությունն ավելի բարձր է բոլոր տարիքային խմբերում հոսպիտալացումների կանխարգելման առումով: Երկու պատվաստանյութերն էլ նվազեցնում են հոսպիտալացման և մահվան դեպքերի առաջացման ռիսկը»։
Հիշեցնենք՝ վերջին օրերին Եվրոպական մոտ մեկ տասնյակ երկրներ, այդ թվում՝ Գերմանիան, Ֆրանսիան, Դանիան, Իսլանդիան, Իռլանդիան, Իտալիան, Նորվեգիան, Նիդեռլանդները, որոշել են դադարեցնել «AstraZeneca» պատվաստանյութի կիրառումը։ Պատճառը տեղեկություններն ու ի հայտ եկած կասկածներն են, թե բրիտանա-շվեդական այդ դեղամիջոցով պատվաստվածների մոտ արյան մակարդելիության խնդիրներ են առաջանում։ Դանիան առաջին երկիրն էր, որն անցյալ շաբաթ դադարեցրեց պատվաստանյութի օգտագործումը։
Վերջին մեկ շաբաթում եվրոպական միանգամից մի քանի երկրներում լուրջ կասկածներ են ի հայտ եկել, որ այդ պատվաստանյութովպատվաստվածների մոտ կարող են առողջական լուրջ խնդիրներ ծագել։ Խոսքը, մասնավորաբար, արյան տրոմբների ծագման մասին է։ AstraZeneca—ից պնդում են, որ Մեծ Բրիտանիայում և ԵՄ-ում պատվաստված 17 միլիոն մարդկանց շրջանում կողմնակի ազդեցությունների վերաբերյալ տվյալների ուսումնասիրությունը չի հայտնաբերել արյան թրոմբոզի աճի ռիսկի վկայություն:
