Հայկական զինուժը մարտի 16-20-ը 7500 զինծառայողի մասնակցությամբ մարտավարամասնագիտական զորավարժություն կանցկացնի

ՀՀ պաշտպանության նախարարությունից հայտնում են, որ Զինված ուժերի (ԶՈւ) պատրաստության 2021թ. առաջին կիսամյակի պլանի համաձայն, մարտի 16-ից 20-ը ՀՀ զինված ուժերի բոլոր օպերացիոն ուղղություններում անցկացվելու են մարտավարական և մարտավարամասնագիտական համատեղ զորավարժություններ, համազորային, զորատեսակների և հատուկ զորքերի ստորաբաժանումների ընդգրկմամբ, նպատակ ունենալով՝

- ստուգել զորքերի մարտունակությունը, օպերատիվ օղակի կառավարման կարողությունները և ստեղծված իրավիճակում արագ գործելու ունակությունները,

- ճշտել հաստիքային, տրված և աջակցող ուժերի ու միջոցների փոխգործակցության հարցերը,

- անցկացնել ստորաբաժանումների և կրակի կառավարման մարզումներ՝ օպերատիվ-մարտավարական դրվագների խաղարկմամբ, ինչպես մարտական, այնպես էլ ոչ մարտական հրաձգություններով:

«Մարտավարական և մարտավարամասնագիտական զորավարժություններին ընդգրկվում են շուրջ 7500 զինծառայող, շուրջ 200 հրթիռային, ռեակտիվ-հրետանային և հրետանային, ավելի քան 150 հակատանկային միջոցներ, շուրջ 100 զրահատեխնիկա, ավելի քան 90 հակաօդային պաշտպանության միջոցներ: Զորքերի մարտավարական գործողություններին աջակցելու համար զորավարժություններին կներգրավվեն նաև օդային հարձակման միջոցներ (ավիացիա)»,-ասված է ՊՆ տարածած հաղորդագրությունում։

Նշենք՝ մարտի 15-ից էլ Ադրբեջանի զինուժը օպերատիվ-մարտավարական լայնամասշտաբ զորավարժություններ կանցկացնի՝ տարատեսակ զինտեխնիկայի և 10 000 զինծառայողի մասնակցությամբ։ Պլանային զորավարժությունները կտևեն 4 օր։