Բայրամովը դիմել է Գուտերեշին՝ խնդրելով Հայաստանից պահանջել ականապատված տարածքների քարտեզները

Ադրբեջանի արտաքին գործերի նախարար Ջեյհուն Բայրամովը փետրվարի 22-ին նամակով դիմել է Միավորված ազգերի կազմակերպության (ՄԱԿ) գլխավոր քարտուղար Անտոնիո Գուտերեշին՝ բողոք հայտնելով, թե Հայաստանը պատերազմի ավարտից հետո չի փոխանցել Ադրբեջանի ենթակայության տակ անցած տարածքների ականապատման վերաբերյալ քարտեզները:

Ադրբեջանական Trend գործակալության հաղորդմամբ՝ Ադրբեջանի արգործնախարարության պաշտոնական հաղորդագրությունում շեշտվում է, որ «Հայաստանը հրաժարվում է ճշգրիտ տեղեկություններ հայտնել ականապատված տարածքների մասին, ինչը հակասում է միջազգային մարդասիրական իրավունքի նորմերին», մինչդեռ, ըստ պաշտոնական Բաքվի, հետպատերազմական շրջանում «Ադրբեջանի ազատագրված տարածքներում ականների և այլ պայթուցիկ սարքերի առկայությունը լուրջ վտանգ է ներկայացնում ադրբեջանցի զինծառայողների և խաղաղ բնակիչների առողջության համար»:

Ընդգծվում է, որ Լեռնային Ղարաբաղում պատերազմի ավարտից՝ 2020 թվականի նոյեմբերի 10-ին ստորագրված եռակողմ հայտարարության ստորագրումից հետո, Բաքվի վերահոսկողության տակ անցած տարածքներում ականների պայթյուններից զոհվել է 15 մարդ, այդ թվում՝ 9 խաղաղ բնակիչ, վնասվածք է ստացել 65 մարդ, որից 8-ը՝ խաղաղ բնակիչ:

Նշյալ փաստերից ելնելով՝ Բայրամովը Գուտերեշին խնդրում է իր լիազորությունների շրջանակում համոզել Հայաստանին կատարելու իր ստանձնած պարտավորությունը՝ տրամադրելով տեղեկատվություն ականադաշտերի վերաբերյալ, ինչպես նաև դադարեցնելու եռակողմ հայտարարությամբ նախատեսված խաղաղության, անվտանգության ու համագործակցության իրականացմանը խոչընդոտող բոլոր գործողություններն ու հայտարարությունները։