Онлайн
ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը հանդես է եկել իրենց թիմի բոլոր անդամներին, աջակիցներին ու համախոհներին ուղղված կոչով՝ ակտիվորեն մասնակցել փետրվարի 20-ին կայանալիք հանրահավաքին, իսկ հետագայում` ընդդիմության մյուս բոլոր միջոցառումներին:
«Վստահ ենք, որ յուրաքանչյուր քաղաքացի այսօր պետք է միանա պայքարին՝ հանուն Հայաստանի և Արցախի ապագայի: Մեր ազգային վերածննդի առաջին նախապայմանը դավաճանների իշխանության շուտափույթ հեռացումն է»,-ասված է Սողոմոնյանի՝ ՀՀ երկրորդ նախագահի Թելեգրամ ալիքում արած հրապարակման մեջ։
Հիշեցնենք՝ փետրվարի 20-ին, ժամը 15:00-ին, Երևանի Ազատության հրապարակում կայանալու է «Հայրենիքի փրկության շարժման» հանրահավաքը: Նախատեսված հանրահավաքի նախապատրաստական աշխատանքներով պայմանավորված՝ շարժման վարչապետի թեկնածու Վազգեն Մանուկյանն այսօր և վաղը չի այցելելու Ազատության հրապարակ, ինչպես անում էր երկուշաբթի օրվանից՝ փետրվարի 15-ից ամեն երեկո՝ 17։00-19։00 ընկած ժամերին:
«Վազգեն Մանուկյանը քաղաքացիներին Ազատության հրապարակում կսպասի փետրվարի 20-ին՝ ժամը 15:00-ին»,-տեղեկանում ենք «Հայրենիքի փրկության շարժման» ֆեյսբուքյան գրառումից։
