Онлайн
Ռուսաստանն ու Թուրքիան ակտիվորեն աշխատում են տիեզերական արդյունաբերության ոլորտում համագործակցության զարգացման երկկողմ միջկառավարական համաձայնագրի նախապատրաստման ուղղությամբ: Այս մասին գրում է ռուսական ՏԱՍՍ լրատվական գործակալությունը՝ հղում կատարելով «Ռոսկոսմոսի» մամուլի ծառայությանը:
«Ռոսկոսմոսի» փոխանցմամբ` այժմ ակտիվ աշխատանքներ են ընթանում տիեզերական տեխնոլոգիաների զարգացմանն ուղղված երկկողմ համաձայնագրի ստորագրման ուղղությամբ, ինչը, համոզված են պետական կորպորացիայում, ամուր հիմք կդնի երկրների միջև տիեզերական գործունեության ոլորտում համագործակցության հետագա հաջող զարգացմանը:
«Ռոսկոսմոս»-ից միաժամանակ նշել են, որ ողջունում են տիեզերական ոլորտում Ռուսաստանի հետ երկկողմ համագործակցություն հաստատելու շահագրգռվածության մասին թուրք գործընկերների հայտարարությունները և հաստատում են պատրաստակամությունը՝ քննարկելու թուրքական կողմի հետ լայնամասշտաբ մասնագիտացված համագործակցություն սկսելու հնարավորությունները:
Գործակալությունն այսպիսով արձագանքել է Թուրքիայի Տիեզերական գործակալության ղեկավար Սերդար Յըլդըրմի երեկ հնչեցրած հայտարարությանը, ըստ որի՝ Անկարան առաջիկա ամիսներին կհստակեցնի այն ոլորտները, որոնցում ծավալվելու է երկու երկրների համագործակցությունը տիեզերքում։
