Онлайн
«Հայաստանն ու Ադրբեջանը վիճել են 140 գերիներին վերադարձնելու Երևանի պահանջի շուրջ։ Նրանց անունները դեռ հայկական փոխանակման ցուցակում են»,- այս մասին rbc-ին ասել է ռուսական դիվանագիտական աղբյուրը, հաստատել՝ հայկական կողմի տեղեկացված զրուցակիցը:
Պարբերականը գրում է, որ, համաձայն Լեռնային Ղարաբաղի (ԼՂ) հակամարտության գոտում ամբողջական հրադադարի և բոլոր ռազմական գործողությունների ավարտի մասին 2020-ի նոյեմբերի 10-ից ուժի մեջ մտած եռակողմ հայտարարության 8-րդ կետի պահանջի, Ադրբեջանը և Հայաստանը պետք է փոխանակեին ռազմագերիներին, պատանդներին և պահվող այլ անձանց ու մահացածների մարմինները։
«Ադրբեջանն արդեն վերադարձրել է իր բոլոր ռազմագերիներին, ինչը հաստատում են ինչպես հակամարտության կողմերը, այնպես էլ՝ Ռուսաստանը, մինչդեռ հայկական կողմի ցուցակում շարունակում են մնալ ավելի քան 140 անուններ»,-գրում է rbc-ն՝ ընդգծելով, որ Բաքուն պնդում է, որ պահվող անձանց հնարավոր չէ փոխանակել:
«Նրանց մի մասը գերեվարվել է ռազմական գործողությունների ավարտից հետո, մյուսներն էլ մեղադրվում են 3 հոդվածներով՝ «Վարձկանություն», «Ահաբեկչություն», «Ռազմական հանցագործություններ»,-գրում է կայքը՝ նշելով, որ համաձայն եռակողմ հայտարարության՝ հայկական կողմին արդեն վերադարձվել է 60 մարդ։
