Онлайн
Երևանի քաղաքապետարանի աշխատակիցների` սեպտեմբերից չստացած պարգևավճարներով զինհաշմանդամների շենքերում վերելակներ կտեղադրվեն և շենքերի մուտքերը կհարմարեցվեն սայլակով տեղաշարժին:
Այդ մասին ֆեյսբուքյան գրառմամբ հայտնում է Երևանի քաղաքապետ Հայկ Մարությանը։
«Արդեն տեղեկացրել ենք, որ կապված պատերազմական իրադրության հետ, քաղաքապետարանի աշխատակազմը սեպտեմբերից ի վեր պարգևավճարներ չի ստացել։
Որոշել ենք խնայված միջոցները տրամադրել պատերազմի ընթացքում հաշմանդամություն ստացած մեր տղաների համար մատչելի պայմաններ ստեղծելու գործին:
Մասնավորապես, այդ գումարներով զինհաշմանդամների շենքերում վերելակներ կտեղադրվեն և շենքերի մուտքերը կհարմարեցվեն սայլակով տեղաշարժին: Սոցապ նախարարությունից արդեն խնդրել ենք տվյալներ՝ պատերազմի մասնակիցների վերաբերյալ, որոնք մշակելով՝ կիրականացնենք այս գործընթացը:
Շնորհակալ եմ քաղաքապետարանի աշխատակազմին՝ այս որոշման կարևորությունը գիտակցելու և այս ծանր օրերին երկրի խնդիրներին անմասն չմնալու համար»,-գրել է քաղաքապետը։
Նշենք՝ Երևանի քաղաքապետի մամուլի խոսնակը օրեր առաջ հայտնել էր, որ Երևանի քաղաքապետարանի մի խումբ աշխատակիցներ, տեղեկանալով, որ տարեվերջյան պարգևավճարներ չեն լինելու, դեկտեմբերի 17-ին հավաքվել են քաղաքապետարանի միջանցքում՝ պահանջելով տալ այն:
