Онлайн
Ավարտվել են Շուշիի արևմտյան մասով անցնող էլեկտրահաղորդման գծերի վերանորոգման աշխատանքները:
Այդ մասին հայտնում են Ռուսաստանի Դաշնության պաշտպանության նախարարությունից (ՌԴ ՊՆ)՝ նշելով, որ արդյունքում Էլեկտրաէներգիայի մշտական մատակարարում է ապահովվել 24 բնակավայրի համար, որոնցում ապրում է ավելի քան 10 հազար մարդ:
Տարածած հաղորդագրությամբ Ռուսաստանի պաշտպանական գերատեսչությունը նաև հայտնում է, որ Լեռնային Ղարաբաղում խաղաղապահ ուժերի զինծառայողները Մարտակերտ են հասցրել սննդի և առաջին անհրաժեշտության իրերի հումանիտար բեռը, սննդամթերքի պարագաներ և առաջին անհրաժեշտության իրեր են ստացել իերնց տներ վերադարձած գյուղացիները։
Օգնություն է տրամադրվել նաև գյուղերի այլ կարիքավոր բնակիչներին:
Մի քանի հարյուր ընտանիքներ ստացել են մարդասիրական փաթեթներ, որոնց մեջ եղել են սնունդ և առաջին անհրաժեշտության իրեր:
Ըստ աղբյուրի՝ ռուս խաղաղապահների օգնությամբ վերականգնվում են ռազմական գործողություններից տուժած Լեռնային Ղարաբաղի տարածքի կարևոր ենթակառուցվածքները:
Միաժամանակ նշվում է, որ ՌԴ ՊՆ Ստեփանակերտի և Մարտակերտի բժշկական ստորաբաժանումների մասնագետները շարունակում են բժշկական օգնություն ցուցաբերել բնակչությանը, որոնք հիմնականում դիմում են քրոնիկ հիվանդությունների խնդրով։
Ընդհանուր առմամբ, ռուս ռազմական բժիշկները բուժօգնություն են ցուցաբերել 529 քաղաքացու, այդ թվում ՝ 63 երեխայի:
