Онлайн
Պաշտոնական Փարիզը չի ճանաչում Լեռնային Ղարաբաղի «ինքնահռչակ հանրապետությունը»: Այդ մասին հայտարարել է Ֆրանսիայի արտաքին գործերի նախարարության (ԱԳՆ) մամուլի ծառայությունը։
«Որպես ԵԱՀԿ Մինսկի խմբի համանախագահող երկիր մեր պարտականությունն է աշխատել ղարաբաղյան հակամարտության կարգավորման ուղղությամբ բանակցային ճանապարհով, մասնավորապես` Լեռնային Ղարաբաղի ապագա կարգավիճակի շուրջ, և այդ բանակցությունների արդյունքը չի կարող որոշվել նախապես և միակողմանի»,-ՏԱՍՍ լրատվական գործակալության փոխանցմամբ՝ ասված է Ֆրանսիայի արտաքին գերատեսչության՝ նախօրեին տարածած հայտարարությունում:
Հայտարարությունում նաև ասվում է, որ ներկայում Ֆրանսիայի առաջնահերթությունը պետք է լինի հակամարտության հետևանքով տեղահանված անձանց անվտանգ վերադարձի ապահովումը։
Ֆրանսիան, ինչպես ընդգծել է նախարարությունը, «լիովին վճռական է հասնելու հակամարտության տևական կարգավորմանը՝ հաշվի առնելով տարածաշրջանի ժողովուրդների անվտանգության և արժանապատվության պահանջները և կշարունակի անել անհրաժեշտ ամեն բան՝ Հարավային Կովկասում իրադրության կայունացման համար»։
«Փարիզը կպահպանի իր հանձնառությունը Մինսկի խմբի համանախագահության ներքո` առաջ շարժվելով բոլոր այն չափորոշիչներով, որոնք դեռ պետք է համաձայնեցվեն հրադադարի մասին համաձայնագրից հետո, որը կնքվել է նոյեմբերի 9-ին, մասնավորապես, օտարերկրյա վարձկանների և տարածաշրջանի պատմամշակութային ժառանգության պաշտպանության մասով»,-ասված է Ֆրանսիայի ԱԳՆ տարածած հայտարարությունում:
Հիշեցնենք՝ նոյեմբերի 25-ին Ֆրանսիայի Սենատը 305 կողմ, 1 դեմ ձայների հարաբերակցությամբ ընդունեց «Լեռնային Ղարաբաղի Հանրապետության ճանաչման անհրաժեշտության վերաբերյալ» բանաձև՝ կոչ անելով երկրի կառավարությանը ճանաչել Արցախի անկախությունը։
Բանաձևի ընդունումը ողջունել են Հայաստանը, Արցախի արտաքին քաղաքական գերատեսչությունը այն համարձակ դիրքորոշում է որակել, իսկ Ադրբեջանը քննադատել է այն։
Ադրբեջանի խորհրդարանը, հայտարարելով, որ Ֆրանսիան վերջին օրերի իր դիրքորոշումներով և հայտարարություններով կասկածի տակ է դնում իր չեզոքությունը, կոչ է արել երկրի կառավարությանը դիմել ԵԱՀԿ ղեկավարությանը՝ Ֆրանսիային Մինսկի խմբի համանախագահների կազմից հետ կանչելու կոչով։ Ադրբեջանի ԱԳՆ է կանչվել Բաքվում Ֆրանսիայի դեսպանը, որի միջոցով բողոքի նոտա հղվել Լեռնային Ղարաբաղի վերաբերյալ Ֆրանսիայի Սենատի բանաձևի պատճառով:
