Онлайн
Հայկական միասնական տեղեկատվական կենտրոնից հայտնում են, որ Ռուսաստանի Դաշնության խաղաղապահ զորախմբի և «Կարմիր խաչի» միջազգային կոմիտեի ներկայացուցիչների միջնորդությամբ այժմ ընթանում են անհայտ կորածների որոնման և զոհվածների մարմինների դուրսբերման աշխատանքներ։
«Կողմերի հետ համաձայնեցված որոնողական աշխատանքները տեղի են ունենում ամենօրյա ռեժիմով՝ ընդգրկելով Արցախի սահմանային բոլոր ուղղությունները։ Գերիների վերադարձը և զոհվածների մարմինների փոխանակումը պետական մարմինների առաջնահերթություններից մեկն է, որի ուղղությամբ շարունակվում են համալիր ջանքերը, ինչի շրջանակներում նաև «Կարմիր խաչի» աշխատակիցներն այցելել են ռազմական գործողությունների հետևանքով Ադրբեջանում գտնվող գերեվարված զինծառայողներին ու քաղաքացիական անձանց»,-ասված է տարածած տեղեկատվությունում:
Նշենք՝ Կարմիր Խաչի միջազգային կոմիտեի ղեկավար Պետեր Մաուրերը, այսօր rbc-ում հրապարակված հոդվածի համաձայն, անդրադառնալով Լեռնային Ղարաբաղի հակամարտության գոտում դիերի դուրս չբերելու հետևանքով հնարավոր վտանգներին, ասել է.
«Ամենատհաճ հետևաքները կարող են լինել: Կարող է լինել հողի աղտոտում: Եթե նախքան ձմեռը դիերը չհայտնաբերվեն՝ կարող է նույնականացման հետ կապված բարդություններ լինեն: Որովհետև, հավանական է, որ եթե այս աշխատանքները ձգձգվեն, ապա ձմռանը դիերը կսկսեն փտել: Մենք անցյալի փորձից գիտենք, որ եթե արագ չգործենք՝ պարզապես կբարդացնենք անհայտ կորած մարդկանց մասին հետագա քննարկումները: Պարզապես ուզում եմ հիշեցնել, որ նախորդ պատերազմն ավարտվել էր 28 տարի առաջ, բայց մեր ցուցակներում դեռ կան 4500 անհայտ կորածներ»:
