Եթե Ա. Քոչարյանն իրոք մտածում է, որ «բանակ էլ, համարյա էդպիսին, չկա», ապա ՊՆ-ն կուղեկցի նրան ստորաբաժանումներ, պայմանով, որ նա ներողություն կխնդրի բոլորից. ՀՀ ՊՆ

ՀՀ պաշտպանության նախարարությունը (ՊՆ) հայտարարություն է տարածել՝ անդարադառնալով ՀՀ Ազգային ժողովի (ԱԺ) պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի՝ խորհրդարանական ամբիոնից հնչեցրած դատողություններին:

ՀՀ ՊՆ հայտարարությունում, մասնավորապես, ասված է.

«Նոյեմբերի 17-ին ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը խորհրդարանական ամբիոնից հերթական անգամ իր դատողությունները ներկայացրեց Արցախի դեմ սանձազերծված պատերազմի ընթացքում ՀՀ պաշտպանության նախարարության գործողությունների վերաբերյալ, որոնք, ինչպես և նախորդ բոլոր դիտարկումներն ու հայտարարությունները, ոչ միայն կտրված էին իրականությունից, այլև ակնհայտորեն միտված էին այդ իրականությունը խեղաթյուրելուն և ստեղծված իրադրության համար քավության նոխազներ փնտրելուն։

Թե ինչու՞ է Անդրանիկ Քոչարյանը վերջին շրջանում այդքան ջանադրաբար փորձում նսեմացնել բանակի դերակատարությունը պատերազմի ընթացքում՝ թողնում ենք հարգարժան պարոնի խղճին։ Այդուհանդերձ, խորապես գիտակցելով նրա հնչեցրած հրապարակային հայտարարությունների մեջ առկա ակնհայտ և քողարկված վտանգները, ստիպված ենք ևս մեկ անգամ անդրադառնալ նրա հնչեցրած մտքերին, որոնք պաշտպանական համակարգի վերաբերյալ գիտելիքների հարցում բոբիկ լինելու հերթական վկայությունն են։

Մասնավորապես, պաշտպանության ոլորտի խնդիրները համակարգող խորհրդարանական պաշտոնյան հայտարարում է, թե «բանակ էլ, համարյա էդպիսին, չկա, բայց դրանք զինված մարդիկ են»։ Սա խորը անարգանքի դրսևորում է հայկական բանակի մի քանի տասնյակ հազար զինծառայողների հանդեպ, որոնք, ի հեճուկս պարոն Քոչարյանի, որպես կանոնավոր ու մարտունակ բանակ, հենց հիմա էլ մարտական հերթապահություն են իրականացնում ինչպես Հայաստանի Հանրապետության, այնպես էլ Արցախի սահմաններին։ Ու եթե պարոն Քոչարյանն իրոք մտածում է, որ «բանակ էլ, համարյա էդպիսին, չկա, բայց դրանք զինված մարդիկ են», ապա պաշտպանության նախարարությունը սիրով կուղեկցի նրան հայկական բանակի բազմաթիվ ստորաբաժանումներ, պայմանով՝ որ նա ներողություն կխնդրի այդ ստորաբաժանումների զինծառայողներից՝ զինվորից մինչև սպա ու հրամանատար։ Բոլորից»։

Նշենք՝ ԱԺ պաշտպանության և անվտանգության հարցերի մշտական հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանն այսօր իր ելույթում հադարտության կոչ անելով բոլորին ու, նախևառաջ, իրեն, նշել էր.

«Այնպիսի տպավորություն է, թե պարտադրված հրադադարից հետո ռազմական գործողությունները տեղափոխվել են ՀՀ տարածք, մինչդեռ, իրականում հսկայական անելիքներ կան՝ թե՛ քաղաքական դաշտի ներդաշնակությունը կառուցելու, թե՛ քաղաքական հարթակում խնդիրների լուծումը գտնելու առումով: Պատերազմը պետք է դադարեցնել Հայաստանի տարածքում: Լինե՛նք հանդարտ: Մենք անընդհատ կարող ենք մեղադրել… Չեմ ուզում քննարկենք Փաշինյանի հրաժարականի հարցը, բայց պետք է քննարկենք այն ճանապարհային քարտեզը, որով պետք է հասնենք ներդաշնակման, որովհետև այս բարոյալքման պրոցեսի տակից միասին ենք դուրս գալիս: Մեր Զինված ուժերը ստացել է այնպիսի հարված, որ մենք ունենք առաջնահերթ խնդիր՝ փրկել զինուժի փշրանքները, որովհետև առանց դրա չենք կարող դիմակայել ապագա մարտահրավերներին: Պարտադրված հրադադարը մեզ հնարավորություն է տվել փրկել այդ փշրանքները: ...Բանակը չի կարող մասնակցել ներքաղաքական զարգացումներին, առանց այդ էլ՝ բանակ էլ համարյա էդպիսին չկա, բայց դրանք զինված մարդիկ են: ...Պատերազմը Երևանից դուրս մենք պարտվել ենք, բայց Երևանի մեջ չպիտի պարտվենք»:

Անդրանիկ Քոչարյանի ելույթի մանրամասները՝ տեսանյութի 3:07:07-3:16:18-ն ընկած ժամանակահատվածում: