Խստորեն հորդորում եմ պահպանել հայկական պետական այս կառույցը․ Մնացականյանը հրաժեշտ է տվել ԱԳՆ անձնակազմին

ՀՀ արտաքին գործերի նախարարությունը (ԱԳՆ) ֆեյսբուքյան հրապարակմամբ տեղեկացնում է, որ Զոհրաբ Մնացականյանն այսօր հանդիպել է ԱԳՆ անձնակազմին, հրաժեշտ տվել ու խստորեն հորդորել պահպանել հայկական պետական այդ կառույցը։

«Սիրելի գործընկերներ,

Բոլորդ արդեն գիտեք իմ` հրաժարականի մասին դիմում ներկայացնելու լուրը:

Խստորեն հորդորում եմ պահպանել հայկական պետական այս կառույցը։

Ձեզանից յուրաքանչյուրը զինվորի պես ամուր կանգնած է իր դիրքում և պետք է շարունակի ամենաուժեղ, ամենալավ ձևով իր գործը: Ես հավատում եմ ձեզ և որևէ կասկած չունեմ դրանում:

Շատ հպարտ եմ ձեզանով, և սպասելու եմ ձեզանից յուրաքանչյուրից լավագույն արդյունքի:

Մենք ունենք շատ լավ երկիր, շատ լավ ժողովուրդ: Մեր հպարտությունը, ինքնավստահությունը, վճռականությունը տեղում են: Ուրեմն, շարունակե՛ք աշխատել ձեր ուժերի ողջ լարումով:

Շնորհակալություն բոլորիդ: Սա ինձ համար շատ հարազատ տեղ է, և ես միշտ պահպանելու եմ այդ զգացումը»,-ասել է նախարարը:

Նշենք՝ երեկ հայտնի դարձավ, որ Զոհրաբ Մնացականյանը արտգործնախարարի պաշտոնից հրաժարականի դիմում է ներկայացրել ՀՀ վարչապետին։ ՀՀ նախագահը ստորագրել է ազատման հրամանագիրը։