Շուշի-Բերձոր ճանապարհի որոշ հատվածներ փակ են բնակիչների համար․ ընթանում են դիվերսանտների որոնողական աշխատանքներ

Արցախի պաշտպանության նախարարությունից հայտնում նե, որ ներկա պահին Պաշտպանության բանակի (ՊԲ) ստորաբաժանումների կողմից թշնամական դիվերսիոն խմբերի հավանական ներթափանցման ուղղություններում ընթանում են որոնողական գործողություններ:

Այս ամենով պայմանավորված՝ Շուշի-Բերձոր ճանապարհի որոշ հատվածներ միայն քաղաքացիական բնակչության համար ժամանակավորապես փակ են:

Այսօր ավելի վաղ Արցախի պաշտպանական գերատեսչությունը հաղորդել էր, որ առավոտյան ժամը 10:30-ի սահմաններում, Բերձոր քաղաքից հարավ-արևելք ընկած ճակատային գծի հատվածում ադրբեջանական ուժերը զրահատեխնիկայի ներգրավմամբ նախաձեռնել են հերթական հարձակումը։ ՊԲ ստորաբաժանումներն, անցնելով պաշտպանության, հստակորեն իրականացրել են առաջադրված մարտական խնդիրները և խոցելով հակառակորդի 3 տանկ կասեցրել վերջինիս հարձակումը:

Միաժամանակ նշվել էր, որ ժամը 12:55-ի սահմաններում ևս նույն ուղղությամբ ձեռնարկվել է հերթական հարձակումը, և ադրբեջանական կողմը, կորցնելով ևս 2 տանկ ու 2 հետևակի մարտական մեքենա, դարձյալ հետ է շպրտվել ելման դիրքեր: