Վերջին ժամերին թշնամական 5 տանկ է ոչնչացվել Բերձորից հարավ-արևելք ընկած հատվածում․ հարձակումը կասեցվել է

Արցախի պաշտպանության նախարարությունից հայտնում են, որ այսօր՝ ժամը 10:30-ի սահմաններում, Բերձոր քաղաքից հարավ-արևելք ընկած ճակատային գծի հատվածում թշնամական ուժերը զրահատեխնիկայի ներգրավմամբ նախաձեռնել են հերթական հարձակումը:

Պաշտպանության բանակի (ՊԲ) ստորաբաժանումները, անցնելով պաշտպանության, հստակորեն իրականացրել են առաջադրված մարտական խնդիրները և խոցելով հակառակորդի 3 տանկ կասեցրել վերջինիս հարձակումը:

Ժամը 12:55-ի սահմաններում թշնամին նույն ուղղությամբ ձեռնարկել է հերթական հարձակումը և, կորցնելով ևս 2 տանկ ու 2 հետևակի մարտական մեքենա, դարձյալ հետ է շպրտվել ելման դիրքեր:

«Ճակատային գծի տվյալ հատվածում ներկա պահին մարտերը շարունակվում են: ՊԲ-ն վերահսկում է օպերատիվ-մարտավարական իրադրությունը»,-ասված է Արցախի պաշտպանական գերատեսչության տարածած հաղորդագրությունում:

Ավելի վաղ հայտնել էին, որ առավոտյան թշնամական 3 գրոհող տանկ է ոչնչացվել։