Онлайн
«Ցավում եմ, որ այս հարցազրույցի հրապարակումից ընդամենը ժամեր անց Իսրայելը թեկուզ անուղղակի թիրախ դարձավ՝ Վիեննայի սինագոգի տեսքով»,-այդ մասին ֆեյսբուքյան իր էջում գրել է ՀՀ վարչապետ Նիկոլ Փաշինյանը՝ ընդգծելով, այլ ազգերի և հավատքների նկատմամբ հանդուրժողականությունը պիտի դառնա միջազգային հարաբերությունների անառարկելի արժեք:
Նշենք՝ The Jerusalem Post պարբերականին տեսակապի միջոցով տված հարցազրույցում վարչապետ Նիկոլ Փաշինյանն ասել էր․
«Իսրայելը հայտնվել է միևնույն շարքում Թուրքիայի, ահաբեկիչների և սիրիացի վարձկանների հետ` ընթացիկ պատերազմում Ադրբեջանին սատարելու հարցում, և, ի վերջո, տուժելու է այդ դաշինքին միանալու հետևանքով։․․․Կարծում եմ, որ Իսրայելը պետք է մտածի հետևյալի մասին․ փաստորեն վարձկանները, ահաբեկիչները և Իսրայելը, ըստ էության, հիմա գտնվում են նույն կողմում: Իսրայելն ինքը պետք է մտածի, թե սա որքանով հարմար դիրքավորում է իր համար»։
Իսկ հարցին, թե, արդյոք, մեր երկիրը հետաքրքրված է Իսրայելի մարդասիրական օգնությամբ (Հայաստանի դեսպանին հետ կանչելուց հետո նախագահ Ռյուվեն Ռիվլինը զանգահարել էր իր հայ գործընկերոջը և առաջարկել մարդասիրական օգնություն)՝ Փաշինյանը պատասխանել է.
«Հումանիտար աջակցություն մի երկրի կողմից, որը վարձկաններին զենք է վաճառում, որով վարձկանները հարվածի տակ են պահում խաղաղ քաղաքացիական բնակչությունը: Ես առաջարկում եմ, որ Իսրայելն այդ օգնությունն ուղարկի վարձկաններին և ահաբեկիչներին՝ որպես իր գործունեության տրամաբանական շարունակություն»:
Հիշեցնենք՝ երեկ Վիեննայի կենտրոնում կրակոցներ են հնչել, հարձակման օբյեկտներից մեկը եղել է սինագոգը։ Ավստրիայի կանցլեր Սեբաստիան Կուրցը տեղի ունեցածը, որի հետևանքով զոհեր կան, ահաբեկչություն է որակել։
Նշվում է, որ միջադեպը դարձել է «հատուցման մի մասը» Ավստրիայի`«Իսլամական պետություն» ահաբեկչական խմբավորման դեմ պայքարում Ամերիկայի Միացյալ Նահանգների (ԱՄՆ) ղեկավարած կոալիցիային մասնակցելու համար:
Ավստրիայում ՀՀ դեսպանությունը տեղի հայերին հորդորել է խուսափել անհարկի տեղաշարժերից։
