Հայաստանում է Ֆրանսիայի Հանրապետության խորհրդարանական պատվիրակությունը։
ՀՀ Ազգային ժողովից հայտնում են, որ ֆրանսիացի խորհրդարանականները ժամը 10:30-ին կլինեն Ծիծեռնակաբերդի հուշահամալիրում։
«Նուվել դ’Աղմենի» պարբերականի տեղեկացմամբ էլ՝ հոկտեմբերի 24- 27-ը Հայաստանում գտնվող ֆրանսիացի պատգամավորներն այցելելու են նաև Արցախի Հանրապետություն։
«Ճանապարհորդության միջոցով խորհրդարանականները ցանկանում են մարդկանց պատմել, բարձրաձայնել Արցախում տիրող դրամայի մասին և վկայել Հայաստանի հետ հատուկ կապի մասին, որը պատմական բարեկամության արգասիք է»,-փոխանցում է պարբերականը՝ ընդգծելով, որ սեպտեմբերի վերջին ադրբեջանական ուժերը հարձակվեցին Լեռնային Ղարաբաղի վրա, որի հետևանքով խաղաղ բնակչության շրջանում բազմաթիվ զոհեր կան:
Նշվում է, որ այդ ժամանակից ի վեր, չնայած զինադադարի հաստատման կոչերին և Ֆրանսիայի Հանրապետության նախագահի ներգրավմամբ հակամարտության լուծում գտնելու ջանքերին, իրավիճակը շարունակում է մնալ ծայրաստիճան մտահոգիչ: