«Այս վճռորոշ պահին յուրաքանչյուրիդ անհատական մասնակցությունը կարևոր է»․ Արցախում աշխարհազորայինների համակարգ է ներդրվում

«Պաշտպանության մասին» Արցախի Հանրապետության օրենքում լրացումներ կատարելու մասին նախագծի ընդունման անհրաժեշտությունը բխում է ստեղծված պատերազմական իրավիճակից և նպատակ ունի Պաշտպանության բանակի (ՊԲ) հետ մեկտեղ էլ ավելի ամրապնդելու մեր սահմանների պաշտպանությունը:

Այդ մասին ֆեյսբուքյան իր էջում գրել է Արցախի նախագահ Արայիկ Հարությունյանը՝ տեղեկացնելով, որ ստորագրել է իր նախաձեռնությամբ Արցախի խորհրդարան ներկայացված և այսօր ընդունված նախագիծը։

Դա, նշում է նա, կկանոնակարգի Արցախի Հանրապետության զինված պաշտպանությանը կամավորության սկզբունքով աշխարհազորի մասնակցությունը:

«Թշնամու կողմից մեր դեմ սանձազերծված պատերազմում մասնակցում է ինչպես Թուրքիան, այնպես էլ հազարավոր վարձկան-ահաբեկիչներ:

Հայրենական սուրբ պատերազմի այս վճռորոշ պահին ևս մեկ անգամ դիմում եմ մեր ժողովրդին համախմբվելու և ներդնելու բոլոր ջանքերը վերջնական հաղթանակի հասնելու համար: Թշնամու ողնաշարը ջարդելու և մեր սահմաններից ետ մղելու համար յուրաքանչյուրիդ անհատական մասնակցությունը կարևոր է:

Մենք հաղթելու ենք և գալիք սերունդների համար ապահովելու ենք սեփական հողում և հայրենիքում խաղաղ ու անվտանգ ապրելու ապագան:

Ի գործ…»,-ասված է Արայիկ Հարությունյանի գրառման մեջ։

Լուսանկարը՝ Վաղինակ Ղազարյանի