Զոհվել է ԱԻՆ Ճգնաժամային կառավարման ակադեմիայի ևս երկու սան

Արցախի հետ շփման գծում Ադրբեջանի սանձազերծած ռազմական գործողությունների, հայրենքի պաշտպանության համար հակառակորդի ագրեսիան հետ մղելու ընթացքում նահատակվել են ՀՀ արտակարգ իրավիճակների նախարարության Ճգնաժամային կառավարման պետական ակադեմիայի ևս երկու սան՝ Գոռ Ղարաջյանը և Գևորգ Մուրադյանը։

Ճգնաժամային կառավարման պետական ակադեմիայի պաշտոնական կայքից տեղեկանում ենք, որ Գոռը սովորում էր բակալավրի կրթական ծրագրի «Ճգնաժամային կառավարում» մասնագիտության հեռակա բաժնում, իսկ Գևորգը՝ միջին մասնագիտական կրթական ծրագրի 2016-2019 թթ. շրջանավարտ էր։

Օրեր առաջ հայտնի էր դարձել ակադեմիայի ևս երկու սանի՝ Տիգրան Սիմոնյանի և Էրիկ Սահակյանի նահատակման մասին։

Էրիկը, որը Արմավիրի մարզի Փարաքար գյուղից էր, բանակ էր զորակոչվել 2019 թվականին, Տավուշի մարզի սահմանամերձ Ներքին Կարմիրաղբյուր գյուղի բնակիչ Տիգրանն էլ զորակոչվել էր 2018 թվականին։

Խոնարհում ու խնկարկում քաջ հայորդիների շիրիմներին։

Փառք հայոց բանակի բոլոր մարտիկներին։