Հակառակորդի նավթամթերքի հերթական մեծ պահեստն է ոչնչացվել

Արցախի պաշտպանության բանակի փայլուն իրականացրած գործողությունների արդյունքում ադրբեջանական բանակի կենսական կարևորության նավթամթերքի հերթական մեծ պահեստն է ոչնչացվել։ Այդ մասին հայտնում է ՀՀ պաշտպանության նախարարության մամուլի խոսնակ Շուշան Ստեփանյանը։

ՀՀ պաշտպանության նախարարության ներկայացրած տեսանյութը՝ ստորև։

Նշենք՝ Արցախի պաշտպանության նախարարությունն այսօր ավելի վաղ հայտնեց, որ գիշերվա ընթացքում հակառակորդը առաջխաղացման փորձ է կատարել ռազմաճակատի հյուսիսային և հարավ-արևելյան ուղղությամբ: Հակառակորդի գրոհող ստորաբաժանումները ոչնչացվել են հրթիռահրետանային կրակով: Առավոտյան 06:30-ին հերթական հրթիռահրետանային հարվածից հետո, մարտադաշտում թողնելով ևս 60 զոհ, ինչպես նաև 22 միավոր խոցված, մի քանի տասնյակ սարքին տեխնիկա, հակառակորդի` միջոցներով գերհագեցած երեք բրիգադների մնացորդները խուճապահար դիմել են փախուստի։

Հայկական ստորաբաժանումների դիպուկ կրակով քիչ առաջ հարավարևելյան ուղղությամբ խոցվել է հակառակորդի վառելիքաքսուքային պահպանման խոշոր բազա։

«Տոռնադո ադրբեջանական ոչնչացված նավթամթերքի բազայի տեսքով»,-հրապարակելով համապատասխան լուսանկար՝ ֆեյսբուքյան իր էջում նավթամթերքի պահեստի պայթյունի օդերևութաբանական բնորոշումն է տվել «Հիդրոօդերևութաբանության և մոնիտորինգի կենտրոն»-ի տնօրենի տեղակալ Գագիկ Սուրենյանը։