Онлайн
Թշնամին կրկին հրթիռակոծում է Ստեփանակերտ և Շուշի քաղաքները։ Այս մասին իր ֆեյսբուքյան էջում գրել է Արցախի Հանրապետության նախագահի խոսնակ Վահրամ Պողոսյանը:
«Պաշտպանության բանակի (ՊԲ) պատասխանը չի ուշանա։ Սակայն ի տարբերություն Բաքվի ահաբեկչական իշխանության, մենք թիրախավորում ենք ոչ թե քաղաքացիական բնակչությանը, այլ խոշոր քաղաքներում մշտական տեղակայում ունեցող ռազմական օբյեկտները։
Այդ քաղաքներում ապրող խաղաղ բնակչությանը կրկին կոչ ենք անում անհապաղ լքել իրենց բնակավայրերը, որպեսզի խուսափեն հնարավոր զոհերից»,-գրել է Վահրամ Պողոսյանը։
Նշենք՝ արցախյան հարավային ճակատին զուգահեռ հակառակորդն այս րոպեներին հրթիռակոծում է նաև հայկական երկրորդ հանրապետության մայրաքաղաքը։ Հայաստանի պաշտպանության նախարարության ներկայացուցիչ Արծրուն Հովհաննիսյանի փոխանցմամբ՝ այս պահին մեծ ինտենսիվությամբ հրթիռակոծվում է Ստեփանակերտը։
Հիշեցնենք, Արցախի մայրաքաղաքը և Շուշին նախօրեին ևս ինտենսիվ հրետակոծման էին ենթարկվել հակառակորդի կողմից, ինչի հետևանքով առնվազն 4 խաղաղ բնակիչ է զոհվել, շուրջ մեկ տասնյակը՝ վիրավորվել:
