«Երբ վտանգ է սպառնում երկրի սահմաններին՝ ոստիկանը զինվոր է»․ իրավապահները ռազմի դաշտում են

ՀՀ ոստիակնությունը հայտարարություն է տարածել, որում ասված է․

«Ադրբեջանի սանձազերծած պատերազմը ծանր, բայց հերոսական փորձություն է, ոգու փորձություն մեր Հայրենիքի ու ժողովրդի համար, բոլորիս համար՝ մեծ ու փոքրի, տղամարդու և կնոջ, Հայաստանի և Արցախի քաղաքացու, թե սփյուռքահայի համար:

Արցախի սահմանի ողջ երկարությամբ ու Հայաստանի Հանրապետության սահմանային գոտիներում ահեղ մարտեր են:

Ազգը բանակ դարձած ոտքի է կանգնել պաշտպանելու մեր հայրերի ու պապերի արյան գնով պահած հող հայրենին, հայրենի հողի վրա ազատ, անկախ, արժանապատիվ ապրելու և արարելու իրավունքը:

Հայրենական պատերազմ է, ու ռազմաճակատ են մեկնում բոլորը․․․

Երբ վտանգ է սպառնում երկրի սահմաններին՝ ոստիկանը զինվոր է:

Այդպես էր Արցախյան ազատամարտին, Ապրիլյան պատերազմին, այդպես է նաև այսօր։

Հայրենիքը բոլո՜ր որդիներին կանչում է պաշտպանության:

Արցախում, Հայաստանում, ռազմաճակատի բոլոր տեղամասերում միասին ու միասնական են հաղթանակած մեր բանակի քաջարի զինվորները, լեգենդար սպաներն ու հրամանատարները, ոստիկանները, բժիշկները, կամավորականները:

Բոլորը՝ մեկ ու ազգ-բանակ դարձած:

Եվ հաղթելու ենք, որովհետև «իրականում թշնամին նույն թշնամին է, որ մեր առաջ փախչում էր և մենք էլ նույն մենք ենք․․․», նույնն է, որ ջախջախվեց 90-ականներին, ջախջախվեց 2016-ին և այս անգամ էլ ջախջախվելու է:

Հաղթել ենք, հաղթում ենք, հաղթելու ենք՝ մի՛շտ»։

Ավելի վաղ հայտնել էինք, որ զինվորակոչ են պատրաստվում ՀՀ Քննչական կոմիտեի ծառայողները։

Հատուկ նշանակության ստորաբաժանումների հետ «իր բաժին մարտը մղելու համար» առաջնագիծ է մեկնել նաև Արցախի նախագահ Արայիկ Հարությունյանը։

Նրա հետ են նաև Հայաստանի և Արցախի անվտանգության ծառայության տնօրեները։