Онлайн
Անցնող գիշեր ՀՀ օդային տարածքում հակառակորդի խոցված 4 անօդաչուները եղել են հետախուզական։ Այդ մասին հայտնում է ՀՀ պաշտպանության նախարարության մամուլի քարտուղար Շուշան Ստեփանյանը։
Նշենք՝ ըստ Հակաօդային պաշտպանության (ՀՕՊ) տեղորոշման տվյալների՝ ժամը 00։15-ի դրությամբ ՀՀ ԶՈւ կողմից խոցվել է չորս անօդաչու թռչող սարք (ԱԹՍ)՝ մեկը Կոտայքի, ևս երեքը Գեղարքունիքի մարզում։
Ընդհանուր առմամբ՝ ՀՀ օդային տարածքում երեկվա ընթացքում ընդհանուր խոցվել է հակառակորդի 7 անօդաչու։
Նշենք՝ երեկ հրետանային ու ԱԹՍ-ներից հարձակման են ենթարկվել Գեղարքունիքի մարզի Շատվան գյուղը, Մեծ Մասրիկը։ Սպանվել է 1 քաղաքացիական անձ, 2 քաղաքացիական անձ վիրավորում է ստացել: Այս տեղեկություններն առանձին ներկայացվել են նաև ՀՀ Մարդու իրավունքների պաշտպանին (ՄԻՊ)։ Խաղաղ բնակիչներից Մարդու իրավունքների պաշտպանին ահազանգով տեղեկացրել են, որ հարվածային ԱԹՍ-ները ընկել են 2 բնակելի տան վրա՝ այրելով տները։ ՄԻՊ-ը խստորեն դատապարտելի է համարում, որ հարվածներն իրականացվել են հենց բնակելի տների վրա ու գիշերային ժամի, երբ մարդիկ վստահաբար տանն են, իսկ շատ դեպքերում արդեն քնած։
«Սրանք միջագային մարդասիրական իրավունքի կոպիտ խախտումներ են»,-ընդգծվում է տարածած հաղորդագրությունում։
Շատվանը, նշենք, հենց այն գյուղն է, որտեղ երեկ Մարդու իրավունքների պաշտպանի գլխավորած աշխատանքային խմբի գլխավերևում հայտնվել էին ԱԹՍ-ներ և որի պատճառով ստիպված էին եղել դադարեցնել երեկվա փաստահավաք աշխատանքները:
