Онлайн
Այս պահին ճակատային գծի բոլոր ուղղություններում մարտական գործողությունները վերսկսվել են: Ժամը 07:55-ի սահմաններում հայկական ուժերի Հակաօդային պաշտպանության ստորաբաժանումները (ՀՕՊ) Արցախի հյուսիսարևելյան ուղղությամբ խոցել են հակառակորդի 1 ինքնաթիռ և անօդաչու թռչող սարք (ԱԹՍ)։
ՀՀ պաշտպանության նախարարության մամուլի քարտուղար Շուշան Ստեփանյանի փոխանցմամբ՝ հակառակորդի՝ առանձին հատվածներում մեր զորքերի պաշտպանությունը ճեղքելու փորձերը ձախողվել են։
Արցախի պաշտպանության նախարարության տեղեկացմամբ՝ գիշերվա ընթացքում արցախա-ադրբեջանական հակամարտության գոտում իրադրությունը եղել է հարաբերական կայուն-լարված: Առանձին ուղղություններում շարունակվել են փոխհրաձգությունները հրետանային ու հրաձգային զինատեսակներից:
Նշվում է՝ օպերատիվ-մարտավարական իրադրությունում էական փոփոխություններ չեն արձանագրվել, Պաշտպանության բանակի ստորաբաժանումները շարունակում են կասեցնել հակառակորդի բոլոր գրոհները՝ վերջինիս պատճառելով կենդանի ուժի և զինտեխնիկայի կորուստներ:
