«Իրականում վիճակը չափազանց բարդ է»․ ՀՀ ոստիկանություն - RadioVan.fm

Онлайн

«Իրականում վիճակը չափազանց բարդ է»․ ՀՀ ոստիկանություն

2020-09-18 14:17 , Право, 193

«Իրականում վիճակը չափազանց բարդ է»․ ՀՀ ոստիկանություն

ՀՀ ոստիկանությունը պարզաբանում է տարածել իրավապաշտպան Արսեն Բաբայանի՝ սոցցանցերում կատարած գրառման առնչությամբ։

Նշենք՝ Բաբայանը մասնավորապես գրել է, թե պարեկային ծառայություն իրականացնող յուրաքանչյուր ոստիկանի հանձնարարված է օրական առնվազն 30 մարդու տուգանել դիմակ չկրելու համար:

Ոստիկանությունն, ահա, այս պնդումը խեղաթյուրման հետևանք է որակում, ինչի մասին, նշում է, տեղյակ է պահվել Ա. Բաբայանին, որի վերաբերյալ արձանագրության օրինակը կցվել է տարածած պարզաբանմանը։

«Խնդիրը, սակայն, ամսաթվային շփոթն ու թյուրիմացությունը չէ, այլ դիմակ կրելու անհրաժեշտության շուրջ հրահրվող հանրային անվստահության մթնոլորտը:

Աշխարհի տարբեր երկրների, այդ թվում՝ մեր հանրապետության փորձը վկայում է, որ կորոնավիրուսի տարածումը կանխելու ամենաարդյունավետ միջոցը շարունակում է մնալ դիմակը: Եվ ոստիկանությունն էլ բացառապես դիմակ կրելու պահանջի վերահսկողություն է իրականացնում:

Ցավոք, կան խմբեր և անհատներ, որոնք հասարակության մեջ պարբերաբար կասկածամտություն են հրահրում այս ակնհայտ իրողության շուրջ, հրապարակ են նետվում անստույգ փաստեր ու անհիմն պնդումներ, ինչի նպատակը այս հարցում ոմանց անպատասխանատու վերաբերմունքը լեգիտիմացնելն է:

Իրականում վիճակը չափազանց բարդ է, որպեսզի մեզ թույլ տանք ինչ-ինչ հավակնությունների զոհաբերել մեր քաղաքացիների առողջությունը: Կորոնավիրուսի նոր ալիքին դեմ հանդիման՝ աշխարհում կրկին պարտադիր է դարձել դիմակի կիրառումը: Այդ ուղղությամբ խստացվում են երկրների գերակշիռ մասի օրենսդրությունն ու վերահսկողական մեխանիզմները, որոնց կիրարկումն ապահովում են ոստիկանական մարմինները:

Այդ ճանապարհով է գնում նաև մեր հանրապետությունը, և ոստիկանությունը, անկախ անարդար որակումներից ու գնահատականներից, շարունակելու է օրենքով սահմանված իր լիազորությունների կատարումն այդ ոլորտում:

Ակնկալում ենք հանրության ըմբռնումը, աջակցությունն ու համագործակցությունը ոստիկանության հետ, քանի որ մեր երկրում համավարակային անվտանգության ապահովման ու քաղաքացիների առողջության պաշտպանության այլ արդյունավետ ճանապարհ չկա»,-ասված է ՀՀ ոստիկանության տարածած հաղորդագրությունում:

Лента

Рекомендуем посмотреть