Онлайн
Ամուլսարի հանքավայրի շահագործման թույլտվություն ստացած, սակայն բնապահպանների կողմից ավելի քան 2 տարի հանքավայր տանող ճանապարհների շրջափակման հետևանքով տարածքում որևէ աշխատանք չիրականացնող «Լիդիան Արմենիա» ընկերության պահնորդական նոր կազմակերպության անդամները գիշերը հանել են Ամուլսարի պահապանների տնակը՝ տեղադրելով իրենցը։
Այդ մասին տեղեկացնում է Ջերմուկի բնակիչ բնապահպան-ակտիվիստ Շիրակ Բունիաթյանը։
«Այս 2․5 տարվա պայքարի հանգուցալուծումը պետք է այսօր լինի։ Եթե պահնորդական ինչ-որ ծառայություն կարողանում է իր վրա գործառույթ վերցնել ու ոստիկանության փոխարեն մի գիշերվա մեջ ճանապարհները բացել, որն ըստ պայմանագրի՝ պետք է ընդամենը գույք պահպաներ, ուրեմն ժողովուրդն ավելի մեծ իրավունքներ ունի»,-ֆեյսբուքյան տեսանյութում շեշտում է Բունիաթյանը՝ խնդրով մտահոգ քաղաքացիներին կոչ անելով 3 անց կես հավաքվել համապատասխան վայրում ու շարժվել Ամուլսարի իրենց «պոստերը»։ Շեշտում է՝ ցանկացած սադրանք կամ բռնություն արժանանալու է կոշտ պատասխանի։
Հայկական բնապահպանական ճակատն էլ (ՀԲՃ), իր հերթին, ահազանգում է՝ մոբիլիզացիա է անհրաժեշտ:
Ընդգծում են՝ ներկայությունը կարող է բառի բուն իմաստով կյանքեր փրկել:
«Խաղաղ, ոչ բռնի պայքարի շնորհիվ այս խնդիրը վերջապես պետք է դրական հանգուցալուծում ստանա: Պետք է կանխել որևէ բռնության հնարավորություն։ Սա վճռորոշ պահ է: Նաև կոչ ենք անում Երևանում ՀՀ կառավարության, Շրջակա միջավայրի նախարարության, ԱԺ-ի շենքերի մոտ գնալ և պահանջել, որ ձեռքերը ծալած չնստեն: Պատգամավորներն այսօր պիտի լինեն այնտեղ և պաշտպանեն քաղաքացիների անվտանգությունը:
Լիդիանի ունեցած ՇՄԱԳ թույլտվությունը պետք է, վերջապես, ուժը կորցրած ճանաչվի առնվազն վերջին երեք տարվա ընթացքում հաստատված աղաղակող բազմաթիվ փաստերի հիման վրա:
Ամուլսարը սար է մնալու: Ոչ մի այլընտրանք չկա»,-ասված է ՀԲՃ-ի տարածած հաղորդագրությունում:
