Արցախի Հանրապետության կառավարությունը 10 մլն ՀՀ դրամի չափով աջակցություն է փոխանցել Լիբանանի հայկական գաղթօջախին:
Այդ մասին ֆեյսբուքյան գրառմամբ հայտնում է Արցախի նախագահ Արայիկ Հարությունյանը՝ նշելով, որ օբյեկտիվ պատճառներով, այդ թվում՝ համավարակով պայմանավորված, այդ երկիրը տևական ժամանակով հայտնվել է սոցիալ-տնտեսական բարդ իրավիճակում՝ ծանր դրության մեջ դնելով Լիբանանում ապրող մեր բազմաթիվ հայրենակիցների ևս:
«Ցավով արձագանքելով Լիբանանում ստեղծված իրավիճակին՝ այսօր, դիմելով լիբանանահայ մեր քույրերին և եղբայրներին, հայտարարում եմ մեր հերթական պատրաստակամության մասին: Եթե այս օրհասական պահին նրանցից որևէ մեկն իր ապագան մեր հայրենիքի արցախյան հատվածում կառուցելու ցանկություն հայտնի, մենք կընդունենք նրան մեր հարկի տակ՝ սիրով և հարազատի հոգատարությամբ»,-եզրափակել է գրառումը Արցախի նախագահը: