Նիդերլանդների արտաքին գործերի նախարարությունը որոշում է կայացրել Հայաստանին հատկացնել 200 000 եվրո գումար՝ կորոնավիրուսի դեմ պայքարի համար խիստ անհրաժեշտ սարքավորումներ գնելու նպատակով։
Այդ մասին տեղեկացնում են ՀՀ արտաքին գործերի նախարարությունից՝ նշելով, որ նախօրեին՝ հուլիսի 9-ին, Նիդեռլանդների Թագավորության արտգործնախարարության և ՀՀ առողջապահության նախարարության ստորագրված համաձայնագրի համաձայն՝ օժանդակության շրջանակներում հատկացված գումարն ուղղվելու է հայաստանյան ընկերություններից 3 հատ PCR թեսթավորման սարք, 100 հատ հիվանդանոցային մոնիտոր և 1 կենսաբանական անվտանգության խցիկ ձեռք բերելուն։
Նշվում է, որ ՀՀ առողջապահության նախարարությունը հայաստանյան ընկերություններից արդեն պատվիրել է վերոնշյալ սարքավորումները, որոնք Հայաստան կառաքվեն մոտ ժամանակներս։