«Դու հլա «կուխնուց» դուրս արի, նոր ուրիշներին ֆեյսբուքից դուրս գալու խորհուրդ տուր»․ Փաշինյանը՝ Մինասյանին

«Ուզում ե՞ք սոցիալական բունտ՝ հրահրեք սոցիալական բունտ, տեսնենք այդ սոցիալական բունտի արդյունքում դուք որտեղ եք հայտնվելու և ինչ դիրքով, որը շատ կարևոր է: Այսօր խոսում են, ասում են՝ ընդդիմությանը ճնշում են և հանրահավաքներն արգելում են: Մի նրբություն չեն արձանագրել՝ մեր հանրահավաքներն էլ են արգելված նույն տրամաբանությամբ: Տեսանք ձեր արած հանրահավաքը՝ կես միլիոն դոլար ծախսում եք՝ 200 հոգի մարդ եք կարողանում հավաքել, կեսին էլ սպառնալով և այլն: Գալիս եք առանց դիմակների կանգնում և ասում եք՝ չկա կորոնավիրուս: Հիմա էլ թևածում է, հիմա էլ պետք է ասեն՝ իշխանությունը կորոնավիրուսը քցել է ընդդիմության ջանը, որ հիվանդանան, չկարողանան իշխանափոխություն անել: Հիմա էլ ամաչում են ասեն, որ կորոնավիորսով հիվանդացել են ու հերթով հիվանդանում են այդ ակցիայի մասնակիցները: Հանրահավաք կանենք, այս կանենք, իսկ որ մե՞նք արեցինք հանրահավաք: Դուք մեզ եկել հանրահավաքո՞վ եք վախեցնում, դուք եկեք մեզ փողով վախեցրեք, դուք եկեք վախեցրեք մեզ ձեր թալանելու կարողությամբ, դուք եկեք վախեցրեք մեզ ձեր կրթական ցենզով, վախենալու բան է իրոք: Դուք եկել եք մեզ հանրահավաքո՞վ վախեցնում, այ քեզ բան: Այստեղ են ասել՝ կանգնեցրեք ինքնաթիռը՝ իջնող կա»,-այդ մասին այսօր խորհրդարանի ամբիոնից ասաց վարչապետ Նիկոլ Փաշինյանը՝ նախընտրելով 2019 թ. պետական բյուջեի կատարման հաշվետվության եզրափակիչ ելույթում անդրադառնալ ոչ թե թվային ցուցանիշներին, այլև՝ հրատապ հարցերից:

Այդ հարցերի շրջանակում գործադիրի ղեկավարն անդրադարձավ նաև քրեական գործերին՝ նշելով, որ պետք է պարզաբանվի, թե ինչու՞ փետրվարին հայտնի դարձած գործով մինչ օրս պատշաճ քննություն չի արվել:

«Հարցը պարզաբանվել է և այդ հարցի պարզաբանման արդյունքում է, որ նաև կայացվել են կոնկրետ որոշումներ: Բայց ես տարիուկես ասում եմ՝ իրավապահ համակարգը պատշաճ ձևով չի քննում կոռուպցիոն և հարակից գործերը, հենց դրա մասին ենք ասում: Չհասկացա՝ կաշառքներ բաժանեն, երկրի կեսը սեփականաշնորհեն... այն մեկն էլ, մի հոգի էլ կա՝ այն մեկի ընտանիքից, ասում է՝ ես եմ տղամարդը, «կուխնու» սեղանի տակից դուրս չեմ գալիս: Մի հատ էլ ուրիշներին խորհուրդ է տալիս, ասում է՝ դուրս եկեք ֆեյսբուքից և հաղորդակցվեք իրականության հետ: Դու հլա «կուխնուց» դուրս արի՝ նոր ուրիշներին ֆեյսբուքից դուրս գալու խորհուրդ տուր»,-ասաց վարչապետը՝ նկատի ունենալով ՀՀ երրորդ նախագահ Սերժ Սարգսյանի փեսա Միքայել Մինասյանին:

Նշենք՝ Սուրբ Աթոռում Հայաստանի Հանրապետության նախկին դեսպան Միքայել Մինասյանը ֆեյսբուքյան իր էջում պարբերաբար տեսանյութեր է հրապարակում, որոնցում խոհանոցային պայմաններում նա խոսում է ներկա իշխանություններին առնչվող այս կամ այն «բացահայտման» մասին, ի դեպ՝ որոնցից մեկի՝ 20 միլիարդ դրամի ադամանդի և ոսկու ապօրինի արտահանման վերաբերյալ, օրերս ՀՀ ոստիկանությունը հերքող տեղեկություն հրապարակեց:

Ազգային ժողովում Նիկոլ Փաշինյանի եզրափակիչ ելույթի մանրամասները՝ տեսանյութում:

Պատրաստեց՝ Լիաննա Մարգարյանը