«Վեոլիա Ջուր»-ը չեղարկում է կորոնավիրուսով հիվանդներին բուժող 9 բժշկական հաստատությունների մարտ-ապրիլ ամիսների ջրի վարձավճարը

Հայաստանի խմելու ջրի միակ օպերատոր «Վեոլիա Ջուր» ընկերությունը, կարևորելով կորոնավիրուսի հաղթահարման գործընթացում բժիշկների և բժշկական հաստատությունների դերը, որոշում է կայացրել հատուկ պայմաններ տրամադրել COVID-19–ի պացիենտների բուժմամբ զբաղվող 9 բժշկական կազմակերպություններին՝ ազատելով նրանց մարտ և ապրիլ ամիսների ջրի վարձավճարների պարտավորությունից։

Այդ մասին հայտնում են ընկերությունից՝ միաժամանակ թվարկելով հատուկ կարգավիճակ ստացած կազմակերպությունների ցանկը:

Ցանկում ներառված են՝

-«Նորք» ինֆեկցիոն կլինիկական հիվանդանոցը,

-Վնասվածքաբանության և օրթոպեդիայի գիտական կենտրոնը,

-Ոստիկանության բժշկական վարչության հոսպիտալը,

-«Սուրբ Աստվածամայր» ԲԿ–ի ծննդատան մասնաշենքը,

-Արտաշատի բժշկական կենտրոնը,

-Գյումրու ինֆեկցիոն-հակատուբերկուլյոզային հիվանդանոցը,

-Վանաձորի ինֆեկցիոն հիվանդանոցը,

-Կապանի բժշկական կենտրոնի առանձին մասնաշենքը,

-Սուրբ Գրիգոր Լուսավորիչ բժշկական կենտրոնը։

Ընկերությունը շնորհակալություն է հայտնում առողջապահության համակարգում գործող կառույցներին և բժշկական անձնակազմերին՝ իրենց հերոսական աշխատանքի համար։ ««Վեոլիա Ջուր»-ը համոզված է, որ միայն համատեղ ջանքերի շնորհիվ հնարավոր կլինի հաղթահարել մեր առջև ծառացած լուրջ մարտահրավերը»,-շեշտում են ընկերությունից՝ հավելելով, որ շարունակում են աշխատել արտակարգ դրության պայմաններում և ծառայություններ մատուցել բազմահազար հաճախորդներին, ինչպես նաև կենսական կարևորության կազմակերպություններին։