Կորոնավիրուսը ջրի միջոցով չի տարածվում. Հայաստանի խմելաջրի միակ օպերատորը տեղեկացնում է

Կորոնավիրուսը ջրի միջոցով չի տարածվում, այն տարածվում է միայն օդակաթիլային եղանակով. Հայաստանի խմելու ջրի միակ օպերատոր «Վեոլիա ջուր» ընկերությունն այսօր հաղորդագրություն է տարածել՝ անդրադառնալով կորոնավիրուսի տարածման վերաբերյալ ապատեղեկատվություն պարունակող հրապարակումներին:

Ընկերության տարածած հաղորդագրությունում, մասնավորապես, ասված է.

«Հայտնի է, որ բարդ ժամանակների անխուսափելի ուղեկիցը տարատեսակ լուրերն են ու հանրային տագնապը: Ու որքան լարված է իրավիճակը, այնքան ֆանտաստիկ են դրանք դառնում, ասեկոսների ժանրից երբեմն անցնելով դավադրության տեսության, չճանաչելով որևէ տրաբանություն:

Օրերս medianews լրատվական կայքն իր «Ամենահետաքրքիրը մենք արդեն գտել ենք» կարգախոսին հավատարիմ մեդիա դաշտը պեղել և ՌԻԱ Նովոստի գործակալություն նորությունների ժապավենից իր ընթերցողներին է ներկայացրել «սուր ու հետաքրքիր» հաղորդագրություն առ այն, որ ըստ Ռոսպոտրեբնադզորի ղեկավարի՝ վիրուսը կարող է տարածվել նաև ջրի միջոցով, եթե ջուրը մաքուր չէ:

Աստված միայն գիտե, ասել է արդյոք նման բան այդ պաշտոնյան, և եթե ասել է, ապա ինչ համատեքստում, և կամ ինչ ջուր է նկատի ունեցել. ռուսական ջրհորի, գետի, լճի, թե ծորակի: Բայց հստակ հայտնի է, որ Հայաստանում կորոնավիրուսի հետ կապված յուրաքանչյուր «նյութ» չէ, որ կարելի է հրապարակել: Ի վերջո ՀՀ ՊԱՐԵՏԱՏՈՒՆԸ հստակ պահանջներ է ներկայացնում այս կապակցությամբ, ինչը տվյալ դեպքում medianews-ի կողմից չեն կատարվել: Արդյունքում մենք ունենք «նորություն», որը ընթերցողների գիտելիքները լրացնելու փոխարեն միայն կարող է խուճապ առաջացնել նրանց շրջանում:

Վեոլիա ջուրը ընկերությունը ևս մեկ անգամ հիշեցնում է, որ, ըստ ՀՀ Հիվանդությունների վերահսկման և կանխարգելման ազգային կենտրոնի / ncdc.am/.

«Վիրուսը տարածվում է մարդուց մարդ.

• Կորոնավիրուսային հիվանդությամբ COVID-19 հիվանդի հետ սերտ շփման արդյունքում

• Կորոնավիրուսային հիվանդությամբ COVID-19 հաստատված հիվանդի հազալու կամ փռշտալու հետևանքով առաջացած կաթիլի հետ շփման ուղիով, կամ

• Կորոնավիրուսային հիվանդությամբ COVID-19 հիվանդի հազալու կամ փռշտալու հետևանքով առաջացած կաթիլներով աղտոտված մակերեսներին կամ առարկաներին (օրինակ՝ դռան բռնակներ կամ սեղաններ) դիպչելու, այնուհետև՝ բերանին կամ դեմքին դիպչելու հետևանքով»:

Խմելու ջրի միջոցով վիրուսը տարածվել չի կարող նաև այն պատճառով, որ սպառողներին մատակարարվելուց առաջ ջուրը կանխարգելիչ նկատառումներով պարտադիր ՔԼՈՐԱՑՎՈՒՄ է, դրանով իսկ բացառելով որևէ վարակի տարածում:

Եղեք առողջ ու մի հավատացեք FAKE լուրերին, իսկ հարցերի դեպքում դիմեք իրավասու կառավարման մարմիններին:

ՀՀ Պարետատան թեժ գծի հեռախոսահամարներ.

• 8141 – Հայաստանի տարածքից զանգ կատարելիս

• +374 11208141 – արտերկրից զանգ կատարելիս

• 060 83 83 00 – առողջապահական հարցերի դեպքում»: